திருமயம், மார்ச் 6: திருமயம் அருகே கல் ஏற்றி வந்த மினி லாரியும், சுற்றுலா வேனும் நேருக்கு நேர் மோதிக் கொண்ட விபத்தில் ஒருவர் படுகாயம் அடைந்தார். மேலும் 12 பேர் சிறு காயங்களுடன் அதிர்ஷ்டவசமாக உயிர் தப்பினர். கர்நாடக மாநிலத்தில் இருந்து ராமேஸ்வரத்திற்கு சுற்றுலா சென்று விட்டு காரைக்குடி-திருச்சி பைபாஸ் சாலையில் சுற்றுலா வேனில் 10க்கும் மேற்பட்டோர் நேற்று புதுக்கோட்டை நோக்கி சென்று கொண்டிருந்தனர். புதுக்கோட்டையில் இருந்து கல் ஏற்றிக்கொண்டு காரைக்குடி நோக்கி மினி லாரி சென்று கொண்டிருந்தது. திருமயம் அருகே உள்ள ஓலைக்குடிப்பட்டி பகுதியில் சென்றபோது மினி லாரியும், டூரிஸ்ட் வேனும் நேருக்கு நேர் மோதி விபத்துக்குள்ளானது. இதில் மினி லாரி சாலையில் கவிழ்ந்தது. மினி லாரி மோதியதில் சுற்றுலா வேனின் முன்பகுதி பலத்த சேதமடைந்தது. வேனில் வந்த 12 பேருக்கு லேசான காயம் ஏற்பட்டது. மினி லாரி டிரைவர் பலத்த காயம் அடைந்தார். காயமடைந்த அனைவரையும் அக்கம் பக்கத்தினர் மீட்டு திருமயம் அரசு மருத்துவமனைக்கு அனுப்பி வைத்தனர். விபத்து குறித்து திருமயம் போலீசார் வழக்கு பதிந்து விசாரணை நடத்தி வருகின்றனர்.