மேலூர், மார்ச் 6: மேலூர் நகரில் நெரிசலை கட்டுக்குள் கொண்டு வருவதற்காக சாலையின் நடுவில் தடுப்புச்சுவர் அமைக்கும் பணியை நெஞ்சாலைத்துறையினர் மேற்கொண்டுள்ளனர். உரிய இடைவெளி விட்டு தடுப்புச்சுவர் அமைக்க வியாபாரிகள் கோரிக்கை விடுத்துள்ளனர். மேலூர் நகரில் செக்கடி பகுதியில் இருந்து பஸ் ஸ்டாண்ட் வரை போக்குவரத்து நெரிசலாக இருக்கும். குறிப்பாக காலை மற்றும் மாலை வேளையில் நெரிசல் மிகமிக அதிகமாக இருக்கும். எனவே புதிதாக போக்குவரத்து போலீசாக பொறுப்பேற்கும் அதிகாரிகள் இவ்விடத்தில் பேரிகார்ட் வைப்பது வழக்கம்.

இதனால் சற்று போக்குவரத்து நெரிசல் கட்டுப்படுத்தப்படும். அதை தொடர்ந்து அடுத்து பொறுப்பேற்பவர்கள் அதை அகற்றிவிடுவார்கள். இதனால் மீண்டும் நெரிசல் ஏற்பட்டு விடும்.தற்போது இவ்விடத்தில் நிரந்தரமாக சிமென்டால் ஆன தடுப்புச்சுவர் அமைக்க நெடுஞ்சாலை துறை முடிவெடுத்து பணிகளை துவக்கி உள்ளது. இதில் பேங்க் ரோட்டில் திரும்புவதற்கு வசதியாக சாலையில் இடைவெளிவிடாமல் தடுப்புச்சுவர் அமைக்கப்பட்டு வருகிறது. இதற்கு வியாபாரிகள் தரப்பில் எதிர்ப்பு தெரிவிக்கப்பட்டுள்ளது. உரிய இடைவெளிவிட்டு தடுப்புச்சுவர் அமைக்க வேண்டும் என வியாபாரிகள் தரப்பில் இருந்து நெடுஞ்சாலை துறை அதிகாரிகளுக்கு கோரிக்கை மனு அளித்துள்ளனர்.