பொன்னமராவதி, மார்ச் 5: பொன்னமராவதி அருகே பூட்டிய வீட்டில் 8 பவுன் நகை மற்றும் ரூ.20ஆயிரத்தை மர்மநபர்கள் கொள்ளையடித்துச் சென்றனர். புதுக்கோட்டை மாவட்டம், பொன்னமராவதி அருகே வார்பட்டு கொல்லுப்பட்டி வங்களக்காடு பெரியசாமி மகன் பச்சை (43), கூலித்தொழிலாளி. இவரும், இவரது மனைவியும் வழக்கம்போல் வேலைக்கு சென்று விட்டனர். மகள் பச்சையம்மாள் பள்ளிக்கு சென்றுவிட்டார். சம்பவத்தன்று மாலை பச்சையம்மாள் பள்ளி முடிந்து வீடு திரும்பியபோது வீட்டின் பூட்டு உடைக்கப்பட்டு கிடந்துள்ளது. இதன் பின்னர் வீட்டிற்குள் சென்று பார்த்துள்ளார். அங்கு இரும்பு பீரோ உடைக்கப்பட்டு கிடந்தது. உடனடியாக தனது தந்தைக்கும், தாய்க்கும் தகவல் தெரிவித்ததை தொடர்ந்து இருவரும் வீட்டிற்கு வந்து பார்த்துள்ளனர். அங்கு பீரோவில் வைத்திருந்த 8 பவுன் நகை, வெள்ளிக்கொலுசு ஒரு ஜோடி, ரொக்கப்பணம் ரூ.20ஆயிரம் மற்றும் ஒரு செல்போன் ஆகியவற்றை மர்மநபர்கள் திருடிச் சென்றதை கண்டு அதிர்ச்சியடைந்துள்ளனர். இதுகுறித்து பொன்னமராவதி காவல்நிலையத்தில் கொடுத்த புகாரின்பேரில் போலீசார் வீட்டின் உடைத்து கொள்ளைடித்துச்சென்ற கொள்ளையர்களை தேடி வருகின்றனர்.