தேனி, மார்ச். 5: தேனியில் டாஸ்மாக் மேற்பார்வையாளர், தனியார் மதுபார் உரிமம் எடுத்துள்ளோருக்கான தேர்தல் நடத்தை விதிகள் குறித்த விழிப்புணர்வு கூட்டம் நேற்று நடந்தது. மாவட்ட டாஸ்மாக் மேலாளர் பாஸ்கரன் தலைமை வகிக்க, மாவட்ட கூடுதல் போலீஸ் கண்காணிப்பாளர் சாரங்கன் முன்னிலை வகித்தார். உதவி கலால் ஆணையர் விஜயா சிறப்புரையாற்றினார். கூட்டத்தில் டாஸ்மாக் மதுபானக்கடையில் மதுவாங்க டோக்கன்கள் மூலமாகவோ, அடையாள அட்டைகள் மூலமாகவோ மதுபாட்டில்களை விற்க கூடாது, அரசியல் கூட்டங்களில் பணியாளர்கள் பங்கேற்க கூடாது, கடையில் எப்போதையும் விட 30 சதவீதம் விற்பனை அதிகரித்தால் தணிக்கை செய்ய வேண்டியதிருக்கும்.
தவறு நடந்தது தெரியவந்தால் நடவடிக்கை எடுக்கப்படும். கடையின் விற்பனை தொகையை வங்கியில் செலுத்த செல்லும்போது ஆதாரங்களையும் எடுத்து கொண்டு பணியாளர் அடையாள அட்டையுடன் செல்ல வேண்டும் என அறிவுறுத்தினர். இதில் டாஸ்மாக் மதுபானக்கடை மேற்பார்வையாளர்கள், தனியார் மதுபார் உரிமம் எடுத்தவர்கள் என 100க்கும் மேற்பட்டவர்கள் கலந்து கொண்டனர்.