தேனி, மார்ச் 5: தேனி அருகே பழங்கால ஓலைச்சுவடிகள் கோயில் சுவருக்குள் இருந்து கிடைத்துள்ளது. தேனி அருகேயுள்ளது அம்மச்சியாபுரம் கிராமம். இங்கு வேட்டுவன்குல பூர்வீக குடிமக்கள் 68 குடும்பத்தினர் வாழ்ந்து வருகின்றனர். இவர்கள் சுமார் 15 தலைமுறைக்கு முன்னதாக அம்மச்சியாபுரம் வந்து விவசாய தொழில் புரிந்து வசித்து வருவதாக கூறப்படுகிறது.
இவ்வூரின் நடுவே வேட்டைகருப்பசாமி கோயில் உள்ளது. இக்கோயில் நிர்வாகியாக பூசாரி ஈஸ்வரன் இருந்து வருகிறார். மிகப்பழமையான இக்கோயிலை ரூ.18 லட்சம் மதிப்பீட்டில் புனரமைக்கும் பணி துவங்கியது.

இப்பணிக்காக நேற்று, கோயிலின் ஒரு பக்க சுவற்றை இடித்தனர் அப்போது சுவற்றிற்குள் மறைத்து வைக்கப்பட்டிருந்த பழமையான ஓலைச்சுவடிகள் கிடைத்தன. சுமார் 100 ஓலைகள் கொண்ட சுவடிகள் இருந்ததையறிந்து பொதுமக்கள் ஆர்வத்துடன் வந்து பார்த்து சென்றனர். இதுகுறித்து அப்பகுதியினர் கூறுகையில், ‘ஓலைச்சுவடி குறித்து தொல்லியல் துறையினருக்கு தகவல் அளித்துள்ளோம். ஓலைச்சுவடிகளில் உள்ள தமிழ் எழுத்துக்கள் சற்று புரியாத வகையில் உள்ளது. இதனை தொல்லியல் துறையினர் ஆய்வு செய்தால்தான் எதற்காக இந்த ஓலைச்சுவடியை பாதுகாக்க சுவற்றிற்குள் மறைத்து வைத்தனர். இந்த ஓலைச்சுவடிக்குள் என்ன கருத்து புதைந்து கிடக்கிறது என்பது தெரியவரும்’ என்றனர்.