சாத்தூர், பிப்.26: பட்டாசு ஆலை விபத்துகளை தடுக்க வலியுறுத்தி விடுதலை சிறுத்தைகள் கட்சி சார்பில் பெருந்திரள் ஆர்ப்பாட்டம் நடைபெற்றது. விடுதலைச் சிறுத்தைகள் கட்சி விருதுநகர் மேற்கு மாவட்ட செயலாளர் சதுரகிரி தலைமை வகித்தார். ஒன்றிய செயலாளர்கள் ஞனஒளி, மனிமாறன் முன்னிலை வகித்தார்கள். தேர்தல் பொறுப்பாளர் சந்திரன் சிறப்புரையாற்றினார். ஆர்ப்பாட்டத்தின் போது, பட்டாசு தொழில் பாதுகாப்பாக நடைபெற தமிழக அரசையும், மாவட்ட நிர்வாகத்தையும் வலியுறுத்தி கோரிக்கை விடுத்தனர். மேலும் பட்டாசு வெடி விபத்தில் உயிரிழந்தோர் குடும்பத்தினருக்கு ரூ.25 லட்சமும், காயம் அடைந்தவருக்கு ரூ.5 லட்சமும் நிவாரணம் வழங்க வேண்டும். விதிமுறைகளை மீறுபவர்கள் மீது உரிய நடவடிக்கை எடுக்க வேண்டும், கண்காணிக்க தவறும் அரசு அதிகாரிகள் மீது துறை ரீதியான நடவடிக்கை எடுக்க வேண்டும். தொழிலாளர்களுக்கு முறையான பாதுகாப்பு குறித்த பயிற்சி வழங்க வேண்டும். அனைத்து தொழிலாளர்களுக்கும் பி.எப், இ.எஸ்.ஐ மற்றும் குரூப் இன்ஷூரன்ஸ் உள்ளிட்டவை முறையாக வழங்கப்படுகிறதா என்பதை முறைப்படுத்த வேண்டும். மாற்றுத் தொழிலுக்குச் செல்லும் வகையில் சிவகாசி, சாத்தூர், அருப்புக்கோட்டை பகுதிகளில் சிப்காட், சிட்கோ தொழிற்பேட்டைகளை அமைத்து தொழிலாளர்களின் நலன் காக்க வேண்டும் என்று ஆர்ப்பாட்டத்தில் வலியுறுத்தினர்.