பொன்னமராவதி, ஜன. 28: பொன்னமராவதி அருகே இடையாத்தூரில் சாலை அமைக்க ஜல்லிகள் மட்டும் கொட்டியதுடன் பணி கள் பாதியில் நிற்பதால் வாகன ஓட்டிகள் அவதிப்பட்டு வருகின்றனர். பொன்னமராவதி அருகே ஆலவயலில் இருந்து செம்மலாபட்டி வழியாக இடையாத்தூர் செல்லும் தார்ச்சாலை குண்டும் குழியுமாக போக்குவரத்துக்கு தகுதியற்ற நிலையில் இருந்தது. எனவே சேதமடைந்த சாலையை தரமாக அமைக்க வேண்டுமென மக்கள் கோரிக்கை விடுத்தனர். இதையடுத்து குண்டும் குழியுமாக காட்சியளித்த புலவர்ணார்குடியில் இருந்து இடையாத்தூர் வரை தார்ச்சாலை அமைப்பதற்காக ஜல்லிகள் பெயர்த்து கலவை ஜல்லிகள் போடப்பட்டது. இந்த பணிகள் நடந்து ஒரு மாதத்துக்கு மேலாகியும் சாலை அமைக்கவில்லை. இதனால் இந்த சாலை வழியாக செல்லும் வாகன ஓட்டிகள் பெரிதும் சிரமப் பட்டு வருகின்றனர். எனவே புலவர்ணார்குடியில் இருந்து இடையாத்தூர் வரை உடனடியாக தார்ச்சாலை பணியை விரைந்து முடிக்க வேண்டுமென பொதுமக்கள் கோரிக்கை விடுத்துள்ளனர்.