மயிலாடுதுறை, ஜன. 28: புயல் மழையால் பாதிக்கப்பட்ட கரும்பு வயல்களை கணக்கெடுக்காத வேளாண் அதிகாரிகளை கண்டித்து மயிலாடுதுறையில் விவசாயிகள் ஆர்ப்பாட்டம் நடத்தினர். நிவர், புரவி புயல் காரணமாகவும், சமீபத்தில் பெய்த தொடர் மழை காரணமாகவும் பாதிக்கப்பட்ட கரும்பு விவசாயிகளுக்கு தமிழக அரசு நிவாரணம் அறிவித்தும் கணக்கீடு செய்யாமல் புறக்கணித்து வரும் வேளாண்மை அலுவலர்களை கண்டிப்பது, அரசு அறிவித்த நிவாரணத்தொகையை வங்கி கிளைகள் உடனடியாக விவசாயிகளுக்கு வழங்க வேண்டும். பயிர் காப்பீடு இழப்பீடு தொகையை உடனடியாக வழங்கக்கோரி மயிலாடுதுறை தாசில்தார் அலுவலகம் முன் அனைத்து விவசாயிகள் போராட்ட ஒருங்கிணைப்புக்குழு சார்பில் ஆர்ப்பாட்டம் நடந்தது. கரும்பு விவசாயிகள் சங்க செயலாளர் முருகன் தலைமை வகித்தார். தமிழ்நாடு கரும்பு விவசாயிகள் சங்க மாநில செயலாளர் காசிநாதன், காவிரி டெல்டா பாசனதாரர் முன்னேற்ற சங்க தலைவர் கோபி கணேசன், இயற்கை விவசாயி ராமலிங்கம், விடுதலை சிறுத்தைகள் கட்சியை சேர்ந்த வேலுகுபேந்திரன், மோகன்குமார் மற்றும் திரளான விவசாயிகள் பங்கேற்றனர்.