சென்னை: தி.நகர் அபிபுல்லா சாலையில் உள்ள லலிதா ஜூவல்லரி மார்க்கெட் பிரைவேட் லிமிடெட் நிறுவனத்தில் 7 ஆண்டுகளாக ராஜஸ்தானை சேர்ந்த பிரவீன் சிங் என்பவர் தங்க நகைகள் இருப்பு கண்காணிப்பு பிரிவில் வேலை செய்து வந்தார். அலுவலகத்தில் உள்ள தங்க நகைகள் இருப்பு குறித்து கணக்காய்வு செய்யப்படுவது வழக்கம். அதன்படி நேற்று முன்தினம் நகைகள் ஆய்வு செய்யப்பட்டது. அப்போது, மொத்த தங்க நகைகளில் 5 கிலோ 220 கிராம் குறைந்து இருந்தது. இதன் மதிப்பு ரூ.2.40 கோடி. இதையடுத்து பிரவீன் சிங்கை தேடியபோது அவர் மாயமாகி இருந்தது தெரியவந்தது. இதையடுத்து லலிதா ஜூவல்லரி மார்க்கெட் பிரைவேட் லிமிடெட் நிறுவன துணை மேலாளர் முருகன்(51) சம்பவம் குறித்து நேற்று முன்தினம் தேனாம்ேபட்டை காவல் நிலையத்தில் புகார் அளித்தார்.

அதன்படி, போலீசார் சம்பவ இடத்திற்கு சென்று சிசிடிவி கேமரா பதிவுகளை பார்த்த போது, ஊழியர் பிரவீன் சிங் கடந்த சனிக்கிழமை நகைகளை ஒரு பையில் வைத்து கொண்டு செல்லும் காட்சி பதிவாகி இருந்தது. நகைகளுடன் தலைமறைவாக உள்ள பிரவீன் சிங்கை பிடிக்க போலீஸ் கமிஷனர் மகேஷ்குமார் அகர்வால் உத்தரவுப்படி தனிப்படையினர் குற்றவாளியின் செல்போன் எண்ணை வைத்து அவருடன் கடந்த ஒரு வாரத்தில் பேசிய நபர்கள் குறித்த பட்டியல் எடுத்து விசாரணை நடத்தி வருகின்றனர். மேலும், சொந்த மாநிலமான ராஜஸ்தானுக்கு இன்ஸ்பெக்டர் தலைமையிலான ஒரு தனிப்படை  ஒன்றும் விரைந்துள்ளது.