சங்கராபுரம், ஜன. 27: கள்ளக்குறிச்சி மாவட்டம் சங்கராபுரம் அடுத்த ரங்கப்பனூர் கிராமத்தை சேர்ந்த சுப்பு மகன் காமராஜ்(50).அதே கிராமத்தை சேர்ந்த கணேசன் மகன் அர்ச்சுனன்(42). இருவரும் கடந்த 25ம் தேதி மாலை அதே கிராமத்தில் உள்ள ஏரியில் குளிக்க சென்றனர். ஆனால் ஏரியில் குளிக்க சென்றவர்கள் மீண்டும் வீடு திரும்பவில்லை. இதனால் பெற்றோர் மற்றும் ஊர் மக்கள் ஏரிக்கு சென்று தேடியும் கிடைக்கவில்லை. பின்னர் இதுகுறித்து வடபொன்பரப்பி காவல் நிலையத்திற்கு தகவல் கொடுக்கப்பட்டது. அதன்பேரில் போலீசார் மற்றும் சங்கராபுரம் தீயணைப்பு வீரர்கள் விரைந்து சென்று பொதுமக்களின் உதவியுடன் ஏரியில் மாயமான இருவரையும் தீவிரமாக தேடினர். இந்நிலையில் நேற்று ஏரியில் இருந்து இருவரையும் சடலமாக தீயணைப்பு வீரர்கள் மீட்டனர். இறந்துபோன இருவரும் கூலித்தொழிலாளிகள் என்பதும், இவர்களுக்கு திருமணமாகி குழந்தைகள் உள்ளது என்பதும் குறிப்பிடத்தக்கது.