சிவகங்கை, ஜன.27: சிவகங்கை கலெக்டர் அலுவலக மைதானத்தில் 72வது குடியரசு தின விழா கோலாகலமாக நடந்தது. எஸ்பி ரோகித்நாதன் ராஜகோபால் வரவேற்றார். கலெக்டர் மதுசூதன்ரெட்டி கொடியேற்றி வைத்து போலீசாரின் அணிவகுப்பு மரியாதையை ஏற்றுக்கொண்டார். இதில் சுதந்திர போராட்ட தியாகிகள் கவுரவிக்கப்பட்டனர். முன்னாள் படைவீரர் நலத்துறை, வருவாய்த்துறை, வேளாண்துறை உள்ளிட்ட பல்வேறு துறைகளின் சார்பில் 90பயனாளிகளுக்கு ரூ.1 கோடியே 21லட்சத்து 15ஆயிரத்து 931மதிப்பீட்டில் நலத்திட்ட உதவிகள் வழங்கப்பட்டன. காவல் துறையில் சிறப்பாக பணியாற்றிய 126 போலீசாருக்கு பதக்கம் மற்றும் நற்சான்றிதழ்கள் வருவாய்த்துறை உள்ளிட்ட பல்வேறு துறைகளில் சிறப்பாக பணிபுரிந்தவர்கள் 354 பேருக்கு நற்சான்றிதழ்கள் வழங்கப்பட்டன.

போலீசார் சார்பில் அணிவகுப்பு நடந்தது. படைவீரர் பாசறை சார்பில் சிலம்பாட்டம் மற்றும் யோகா, கராத்தே நிகழ்ச்சிகள் நடந்தன. இந்நிகழ்ச்சியில் டிஆர்ஓ லதா, சிவகங்கை மருத்துவக்கல்லூரி டீன் ரத்தினவேல், மகளிர் திட்ட அலுவலர் அருண்மணி, மாவட்ட ஊரக வளர்ச்சி முகமை திட்ட இயக்குநர் வடிவேல், கலெக்டரின் நேர்முக உதவியாளர் சிந்து, ஆர்டிஓ முத்துக்கலுவன், மாவட்ட ஊராட்சி ஒன்றியக் குழுத்தலைவர் பொன்மணி பாஸ்கரன், மாவட்ட முதன்மை கல்வி அலுவலர் பாலுமுத்து, சுகாதாரப்பணிகள் துதுணை இயக்குநர் யசோதாமணி மற்றும் பல்வேறு துறை அலுவலர்கள், போலீசார், பொதுமக்கள் உள்ளிட்டோர் கலந்துகொண்டனர்.