தேவையான பொருட்கள்

அரிசி மாவு / இடியாப்ப மாவு - 1/2 கப்
நல்லெண்ணெய் - 1 தேக்கரண்டி
உப்பு, தண்ணீர் - தேவையான அளவு

தேங்காய் பூரணம் :

துருவிய தேங்காய் - 1 கப்
வெல்லம் - 1 கப்பிலிருந்து 3 மேஜைக்கரண்டி எடுத்து விடவும்
ஏலக்காய் - 2

மோதகம் எப்படி செய்வது?

போதுமான தண்ணீரை, எண்ணெய் சேர்த்து கொதிக்க விடவும். மாவில், உப்பு சேர்த்து, கொதிக்கும் தண்ணீரை ஊற்றி பிசையவும். ஒரு தோசைத்திருப்பியின் காம்பு கொண்டு கிளறலாம். அல்லது ஒரு கரண்டி கொண்டும் கிளறலாம். சிறிது கை பொறுக்கும் சூட்டிற்கு வந்தவுடன், நன்கு பிசைந்து,  12 சமமான அளவு உருண்டைகளாக உருட்டி, மூடிவைக்கவும். வெல்ல பூரணத்திற்கு, தேங்காய், மற்றும் வெல்லத்தை ஒன்றாக மிதமான தீயில் வைத்து கிளறவும். வெல்லம் இளகி, நன்கு தேங்காயுடன் கலந்து மறுபடியும் இறுகும் வரை கிளறி, ஏலக்காய் தூள் சேர்த்து கலந்து இறக்கவும். ஆறியபின் சம அளவு உருண்டைகளாக உருட்டவும். கைகளில் சிறு துளி எண்ணெய் தடவி, உருட்டிய மாவு உருண்டையை,  மெல்லிய தடிமன் உள்ள கிண்ணமாக செய்யவும். உள்ளே பூரண உருண்டையை வைத்து, மூடி, அழகாக மோதகம் வடிவில் செய்யவும். இட்லி தட்டில் எண்ணெய் தடவி, செய்த மோதகங்களை ஆவியில் வேக வைத்து எடுக்கவும்.