புதுடெல்லி: ராஜீவ் காந்தி கொலை வழக்கில் சிறையில் உள்ள பேரறிவாளனை விடுதலை செய்ய உச்சநீதிமன்றம் மறுப்பு தெரிவித்துள்ளது. 26 ஆண்டுகளாக சிறைவாசம் அனுபவித்து வரும் பேரறிவாளன் தம்மை விடுக்கக்கோரி தாக்கல் செய்த மனுவை விசாரித்த உச்சநீதிமன்ற நீதிபதிகள் ரஞ்சன் கோகாய் தலைமையிலான அமர்வு இதற்கான உத்தரவை பிறப்பித்துள்ளது. பேரறிவாளன் தரப்பில் வைக்கப்பட்ட வாதத்தை ஏற்க மறுத்த நீதிபதிகள் அவரது மனுவை தள்ளுபடி செய்துவிட்டனர்.

1999-ம் ஆண்டு உச்சநீதிமன்றம் அளித்த தீர்ப்பை திரும்ப பெற முடியாது என்று கூறியுள்ள நீதிபதிகள், பேரறிவாளன் குற்றவாளி இல்லை என கருதமுடியாது என்று தெரிவித்துள்ளனர். மேலும் ராஜீவ் காந்தி கொலைக்கு பயன்படுத்தப்பட்ட பெல்ட் வெடிகுண்டுக்கும், தாம் வாங்கி கொடுத்த பேட்டரிக்கும் எந்த தொடர்பும் இல்லை என்று பேரறிவாளன் தரப்பில் வாதிடப்பட்டதால், இது குறித்து 4 வாரங்களுக்குள் சிபிஐ பதிலளிக்க வேண்டும் என்று நீதிபதிகள் உத்தரவிட்டுள்ளனர்.