திருப்பூர்: காதல் கலப்பு திருமணம் செய்த உடுமலை சங்கர் படுகொலை வழக்கில் அடுத்த மாதம் டிசம்பர் 12ம் தேதி தீர்ப்பு வழங்கப்படுமென வன்கொடுமை தடுப்பு வழக்குகளுக்கான சிறப்பு நீதிமன்ற நீதிபதி அறிவித்துள்ளார். திருப்பூர் மாவட்டம், உடுமலை தாலுகா குமரலிங்கத்தை சேர்ந்தவர் சங்கர் (22). பொறியியல் பட்டதாரி. இவர், பழனியை சேர்ந்த கவுசல்யா என்ற பெண்ணை காதலித்து கலப்பு திருமணம் செய்தார். இதனால், கடந்த 13.3.2016ம் தேதி, உடுமலை பஸ் ஸ்டாண்ட் அருகில் பட்டப்பகலில் வெட்டி படுகொலை செய்யப்பட்டார். சங்கரின் மனைவி கவுசல்யா படுகாயத்துடன் உயிர் தப்பினார்.

இந்த சம்பவம் தொடர்பாக கவுசல்யாவின் தந்தை சின்னசாமி, தாய் அன்னலட்சுமி, மாமா பாண்டித்துரை, மணிகண்டன், செல்வகுமார், ஜெகதீசன், கலைதமிழ்வாணன், மணிகண்டன், தன்ராஜ், பிரசன்னகுமார் உள்பட 11 பேரை உடுமலை போலீசார் கைது செய்து சிறையில் அடைத்தனர். பொதுமக்களையும், சமுதாயத்தையும் அச்சுறுத்தும் செயலில் ஈடுபட்டதற்காக 9 பேர் மீது குண்டாஸ் போடப்பட்டது.  இவ்வழக்கு திருப்பூர் வன்கொடுமை தடுப்பு வழக்குகளுக்கான சிறப்பு நீதிமன்றத்தில் விசாரிக்கப்பட்டு வருகிறது. வழக்கில் இறுதிகட்ட விசாரணைக்காக குற்றம் சாட்டப்பட்ட 11 பேரும் நீதிமன்றத்தில் நேற்று ஆஜர்படுத்தப்பட்டனர். அப்போது, நீதிபதி அலமேலு நடராஜன் அடுத்த மாதம் (டிசம்பர்) 12ம் தேதி தீர்ப்பு வழங்கப்படும் என்று அறிவித்தார். இதன்பின் 11 பேரும் கோவை சிறைக்கு அழைத்து செல்லப்பட்டனர்.

* கல்லூரி செல்லும்போது உடுமலை சங்கர், பழனி கவுசல்யா இடையே பஸ்சில் மலர்ந்த காதல் திருமணத்தில் முடிந்தது.
* உடுமலை பஸ் ஸ்டாண்ட் அருகில் 13.3.2016ம் தேதி, பட்டப்பகலில் சங்கர் வெட்டிக் கொல்லப்பட்டார்.
* சிசிடிவியில் பதிவான கொலை வீடியோ வைரலாக பரவியது.
* கவுசல்யாவின் பெற்றோர் உள்பட 11 பேர் கைது செய்யப்பட்டுள்ளனர்.