ஸ்டாக்ஹோம்: சர்வதேச தடகள கூட்டமைப்பு சார்பில் ஸ்வீடனில் நடைபெற்று வரும் டயமண்ட் லீக் தொடரின் ஆண்கள் 100 மீட்டர் ஓட்டப் பந்தயத்தில், கனடா வீரர் ஆந்த்ரே டி கிராஸே தங்கப் பதக்கம் வென்றார். பைனலில் அபாரமாக செயல்பட்ட அவர் 9.69 விநாடிகளில் பந்தய தூரத்தைக் கடந்து முதலிடம் பிடித்தார். ஐவரி கோஸ்ட் வீரர் பென் யூசுப் மெய்டி (9.84 விநாடி) வெள்ளிப் பதக்கமும், ஜமைக்கா வீரர் ரியான் ஷீல்ட்ஸ் (9.89 விநாடி) வெண்கலப் பதக்கமும் வென்றனர். இந்த போட்டியின்போது காற்றின் வேகம் விநாடிக்கு 4.8 மீட்டர் ஆக இருந்ததால், ஆந்த்ரே டி கிராஸே சாதனை சட்டபூர்வமாக அங்கீகரிக்கப்படவில்லை. காற்றின் வேகம் விநாடிக்கு 2 மீட்டருக்கு மேல் இருந்தாலே அந்த வெற்றி சாதனை பதிவுக்கு கணக்கில் கொள்ளப்படாது.