மேலுமலை: கிருஷ்ணகிரி - ஒசூர் அருகே மேலுமலை என்ற இடத்தில் தனியார் பேருந்து மீது லாரி ஒன்று பயங்கரமாக மோதியதில் 14 பேர் பரிதாபமாக உயிரிழந்துள்ளனர்.  கிருஷ்ணகிரியிலிருந்து ஒசூர் வழியாக  தனியார் பேருந்து ஒன்று  சென்றது. இந்த பேருந்தில் 60-க்கும் மேற்பட்ட பயணிகள் சென்று கொண்டிருந்தனர். கிருஷ்ணகிரியிலிருந்து சுமார் 20 கி.மீ தொலைவில் மேலுமலை கணவாய் என்ற இடத்தில் பேருந்து சென்று கொண்டிருந்தது. அதே சமயம் ஒசூரிலிருந்து கிருஷ்ணகிரி நோக்கி எதிர் திசையில் கடலை பாரம் ஏற்றிய லாரியானது வந்தது.

அப்போது லாரியானது தனது கட்டுப்பாட்டை இழந்து தடுப்பு கம்பிகளை தகர்த்தெறிந்து எதிர்புறம் வந்து கொண்டிருந்த பேருந்து மீது நேருக்கு நேர் பயங்கரமாக மோதியது. இதனையடுத்து பேருந்தின் பின்னால் வந்த 2 கார்களும் அடுத்தடுத்து தனியார் பேருந்தின் மீது மோதி பயங்கர விபத்து நேரிட்டது. லாரி - பேருந்து - 2 கார் இந்த வாகனங்கள் அனைத்தும் மோதி விபத்து நடந்தது. இந்த கோர விபத்தில் பேருந்தின் முன் பகுதியிலிருந்து பின் பகுதி வரை அப்பளம் போல நொறுங்கியது. இதில் சம்பவ இடத்திலேயே 9 பேர் உயிரிழந்தனர். இந்த விபத்தில் 40க்கும் மேற்பட்டோர் காயமடைந்தனர். இவர்கள் ஒசூர் மற்றும் கிருஷ்ணகிரியில் இருக்கும் அரசு மருத்துவமனைகளில் சிகிச்சைக்காக கொண்டு செல்லப்பட்டனர். சிகிச்சைக்காக அனுமதிக்கப்பட்டவர்களில் நால்வர் உயிரிழந்ததையடுத்து பலி எண்ணிக்கை 14-ஆக உயர்ந்தது. மேலும் பலரது நிலைமை கவலைக்கிடமாக இருப்பதாக தகவல்கள் தெரிவிக்கின்றன.