பரிதாபாத்: ஹரியானா மாநிலத்தைச் சேர்ந்த காங்கிரஸ் தலைவர்களில் ஒருவரான விகாஷ் சவுத்ரி சுட்டுக்கொலை செய்யப்பட்டார். மர்மநபர்கள் துப்பாக்கியால் சுட்டதில் காயமடைந்த காங். பிரமுகர் விகாஷ் சவுத்ரி சிகிக்சை பலனின்றி மருத்துவமனையில் உயிரிழந்தார். ஹரியானா மாவட்டம் பரிதாபாத் செக்டார் 9ல் உள்ள சந்தை அருகே இந்த சம்பவம் நிகழ்ந்துள்ளது. இவர் உடற்பயிற்சி முடித்துவிட்டு காரில் வீடு திரும்பும் போது, எதிரே ஒரு காரில் இருந்து வந்த அடையாளம் தெரியாத நபர்கள் விகாஷ் சவுத்ரி மீது சரமாரியாக சுட்டனர். அவரை 6 அல்லது 10 முறை துப்பாக்கியால் சுட்டதாக தகவல் வெளியாகியுள்ளது.

10 குண்டுகள் உடலை துளைத்து நிலையில், ரத்த வெள்ளத்தில் சரிந்த விகாஷை அக்கம் பக்கத்தினர் மீட்டு மருத்துவமனைக்கு கொண்டு சென்றனர். அப்போது, அவர் ஏற்கனவே இறந்துவிட்டதாக மருத்துவர்கள் தெரிவித்தனர். மேலும், இந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது. தகவல் அறிந்து வந்த காவல்துறை சம்பவ இடத்தில் விசாரணை மேற்கொண்டு வருகின்றனர். அப்பகுதியில் உள்ள சிசிடிவியில் விகாஷ் சவுத்ரி சுட்டுக்கொல்லப்பட்டது பதிவாகியுள்ளதாக கூறப்படுகிறது. அதனைக் கொண்டு மர்மநபர்களை தேடும் பணியில் காவல்துறையினர் ஈடுபட்டுள்ளனர்.