கறம்பக்குடி: காதலியை பார்ப்பதற்காகவே பஸ்சில் பெட்ரோல் குண்டு வீசினேன் என்று கைதானவர் கூறியுள்ளார். புதுக்கோட்டை மாவட்டம் கறம்பக்குடியில்  இருந்து புதுக்கோட்டைக்கு கடந்த 7ம் தேதி காலை அரசு பஸ் சென்றது. ரெகுநாதபுரம் செல்லும் வழியில் பிலாவிடுதி அருகே தைலமர காட்டில் இருந்துஒரு  வாலிபர், டிரைவரை நோக்கி பெட்ரோல் குண்டை வீசியுள்ளார். அதிர்ஷ்டவசமாக யாரும் காயமின்றி தப்பினர்.இது தொடர்பாக கறம்பக்குடி போலீசார் 4தனிப்படை  அமைத்து மர்ம நபரை தேடி வந்த நிலையில், பெட்ரோல் குண்டு வீசியவர் கறம்பக்குடியை சேர்ந்த பாண்டியன் (35) என்பது தெரிய வந்தது. நேற்று முன்தினம்  இரவு வீட்டில் பதுங்கி இருந்த அவரை போலீசார் கைது செய்தனர்.

விசாரணையில், அவர் உறவினர் பெண் தினமும் அந்த பஸ்சில் ரெகுநாதபுரத்தில் உள்ள கல்லூரிக்கு சென்று வருகிறார். நான் அவரை சில மாதங்களாக ஒரு  தலையாக காதலிக்கிறேன். அவரை பார்ப்பதற்காகவே பஸ்சை நிறுத்துவேன். சில நேரங்களில் பஸ் நிற்காமல் சென்றுவிடும். இதனால் பெட்ரோல் குண்டு  வீசினேன் என்று கூறியதாக போலீசார் தெரிவித்தனர். இதையடுத்து பாண்டியனை ஆலங்குடி நீதிமன்றத்தில் ஆஜர்படுத்தி சிறையில் அடைத்தனர்.