லக்னோ: ‘‘உத்தரப்பிரதேசத்தில் ஆட்சியை கைப்பற்றும் நோக்கத்துடன், காங்கிரஸ் தீவிரமாக செயல்படும்’’ என காங்கிரஸ் தலைவர் ராகுல் காந்தி  கூறியுள்ளார். காங்கிரஸ் பொதுச் செயலாளராகவும், உ.பி கிழக்கு பகுதி பொறுப்பாளராகவும் நியமிக்கப்பட்டுள்ள பிரியங்கா கலந்து கொள்ளும் முதல் பொது  நிகழ்ச்சி உத்தரப் பிரதேச தலைநகர் லக்னோவில் நேற்று நடந்தது. அவருடன் காங்கிரஸ் தலைவர் ராகுல் காந்தியும் வந்திருந்தார். லக்னோவில் அவர்கள்  ஊர்வலமாக சென்று காங்கிரஸ் தொண்டர்களை சந்தித்தனர். உடன் உ.பி மேற்கு மாவட்ட பொறுப்பாளர் ஜோதிர்ஆதித்யா சிந்தியாவும் சென்றார். அப்போது ராகுல்  பேசியதாவது:காங்கிரஸ் கட்சியின் நோக்கம் மக்களவை தேர்தலில் வெற்றி பெறுவது மட்டும் அல்ல, உ.பி.யிலும் காங்கிரஸ் ஆட்சியை ஏற்படுத்துவதுதான்.  அதற்காக காங்கிரஸ் கட்சி தீவிரமாக களத்தில் இறங்கும்.

 உ.பி. நாட்டின் மத்திய பகுதி. உ.பி.யில் ஆட்சி அமைக்கும் வரை காங்கிரஸ் சோம்பலாக இருக்காது. அதற்கான பொறுப்பு பிரியங்கா மற்றும் சிந்தியாவிடம்  வழங்கப்பட்டுள்ளது. இங்கு அநீதியை எதிர்த்து போராட வேண்டும் எனவும், உ.பி மக்களுக்கு நீதி கிடைப்பதை உறுதி செய்ய வேண்டும் என அவர்களிடம்  கூறியுள்ளேன்.  இவ்வாறு அவர் கூறினார். காங்கிரஸ் தொண்டர்களிடம் பேசிய ராகுல், ‘‘உத்தரப் பிரதேசம் மற்றும் நாட்டின் இதர மாநிலங்களில் பிரதமர்  மோடி பணத்தை திருடி தொழிலதிபர் அனில் அம்பானிக்கு கொடுத்து விட்டார். அதனால் நீங்கள், ‘காவலாளி திருடன்’ என்ற கோஷத்தை முழங்குங்கள்  என்றார். தொண்டர்களும் அவ்வாறே கோஷமிட்டனர்.