ஓசூர்: ஓசூர் அருகே விவசாய நிலங்களுக்குள் புகுந்து பயிர்களை நாசப்படுத்தும் 4 யானைகளின் அட்டகாசத்தால் விவசாயிகள் வேதனை அடைந்துள்ளனர். கிருஷ்ணகிரி மாவட்டம் ஓசூர் அருகே சானமாவு, போடூர், பேரண்டப்பள்ளி உள்ளிட்ட வனப்பகுதிகளில் 4 யானைகள் முகாமிட்டுள்ளன. இவை கடந்த சில நாட்களாக கிராமங்களுக்குள் புகுந்து விவசாய பயிர்களை நாசம் செய்து வருகின்றன. இந்நிலையில் நேற்று யானைகள் பேரண்டாப்பள்ளி காட்டிற்குள் சென்றன. அங்கிருந்து இரவில் வெளியே வரும் யானைகள் அம்பட்டி, திருச்சிப்பள்ளி, தொரப்பள்ளி கிராமத்திற்குள் புகுந்தன.

அங்கு விவசாயிகள் பயிரிட்டிருந்த தக்காளி, கோஸ், வாழை, அவரை, தென்னை  உள்ளிட்ட   தோட்டத்தை நாசம் செய்தன. பயிர்களை தின்றும், கால்களால் மிதித்தும் நாசம் செய்தன. இதில் 8 ஏக்கர் பயிர்களை நாசம் செய்தன. பின்னர் யானைகள் அனைத்தும் பேரண்டாப்பள்ளி வனபகுதிக்குள் சென்று விட்டன. நேற்று காலை விவசாயிகள் தங்களின் விளைநிலங்களுக்கு சென்றனர். அப்போது பயிர்களை யானைகள் சேதப்படுத்தியிருந்ததை கண்டு வேதனை அடைந்தனர்.

இதுகுறித்து விவசாயிகள் கூறியதாவது: ஓசூர் அருகே சானமாவு மற்றும் போடூர்பள்ளம் காடுகளில் ஒரு மாதமாக யானைகள் முகாமிட்டுள்ளன. அவை விவசாய பயிர்களை தொடர்ந்து  நாசம் செய்து வருகின்றன. இந்த யானைகளை வனத்துறையினர் விரட்டினாலும் மீண்டும் வந்து விடுகின்றன. கர்நாடகா வனப்பகுதியில் இருந்து வந்துள்ள யானைகளை நிரந்தரமாக கர்நாடகா வனப்பகுதிக்குள் விரட்ட வனத்துறை நடவடிக்கை எடுக்க வேண்டும். பயிர்களை அதிகாரிகள் பார்வையிட்டு நிவாரணம் கிடைக்க உதவிட வேண்டும், என்றனர்.