ஒரத்தநாடு: கூலிப்படையினரிடமிருந்து பறிமுதல் செய்யப்பட்ட பைக்கில் போலியான  பதிவு எண்ணை பயன்படுத்தி ஓட்டி வந்த எஸ்எஸ்ஐ  இடமாற்றம் செய்து  எஸ்பி  உத்தரவிட்டுள்ளார்.தஞ்சை மாவட்டம் ஒரத்தநாடு போலீஸ் நிலையத்தில்  கடந்த 10 ஆண்டுகளாக போலீஸ் சூப்பிரண்டின் தனிப்பிரிவு சிறப்பு  சப்-இன்ஸ்பெக்டராக (எஸ்எஸ்ஐ)  பணியாற்றி வரும் ஒருவர், குற்ற பின்னணியில் தொடர்புடைய  ஒரு மோட்டார் சைக்கிளை போலியான பதிவு எண்ணை பயன்படுத்தி போலீஸ்  ஸ்டிக்கருடன் ஓட்டி  வருவதாக உயர் போலீஸ் அதிகாரிகளுக்கு ரகசிய தகவல்  கிடைத்தது. இதையடுத்து, கடந்த 21ம் தேதி இரவு தஞ்சை மாவட்ட போலீஸ்  சூப்பிரண்டின் நேரடி கட்டுப்பாட்டில் செயல்பட்டு வரும் சப்-இன்ஸ்பெக்டர்  கண்ணன் தலைமையிலான  போலீசார், ஒரத்தநாடு போலீஸ் நிலையத்துக்கு சென்று  தனிப்பிரிவு எஸ்எஸ்ஐ வசமிருந்த மோட்டார் சைக்கிளை  கைப்பற்றி, அவரிடம் விசாரணை நடத்தினர்.  

அதில் கடந்த சில மாதங்களுக்கு முன்  ஒரத்தநாடு அடுத்த வன்னிப்பட்டு கிராமத்தில் சிக்கிய கூலிப்படையினரிடம் இருந்து  கைப்பற்றப்பட்ட மோட்டார்  சைக்கிளை போலீஸ் ஸ்டிக்கர் ஒட்டி போலியான பதிவு எண்ணை பயன்படுத்தி இயக்கி வந்ததை எஸ்எஸ்ஐ இளங்கோவன் ஒப்பு கொண்டுள்ளார். இதைதொடர்ந்து அந்த  மோட்டார் சைக்கிளை பறிமுதல் செய்த தனிப்பிரிவு போலீசார், விசாரணை அறிக்கையை  எஸ்பியிடம் சமர்ப்பித்தனர். இதையடுத்து நேற்று  முன்தினம் எஸ்பி   மகேஸ்வரன், இளங்கோவனை சேதுபாவாசத்திரம் போலீஸ்  நிலையத்துக்கு பணியிட மாற்றம் செய்து உத்தரவிட்டார்.