SUN குழுமத்திலிருந்து வெளிவரும் காலை நாளிதழ்

கட்டுமானத் தொழிலாளர்களுக்கு அம்மா உணவகத்தில் இலவச உணவு : சட்டத்திருத்த அரசாணை வெளியீடு

2019-01-22@ 00:14:10

சென்னை: கட்டுமான ெதாழிலாளர்களுக்கு அம்மா உணவகத்தில் இலவச உணவு வழங்குவது தொடர்பாக சட்ட திருத்தம் செய்து தமிழக அரசு அரசாணை வெளியிட்டுள்ளது. முதற்கட்டமாக, சென்னை மாநகராட்சியில் மட்டும் இந்த திட்டம் செயல்படுத்தபட உள்ளது. தமிழகத்தில் சென்னை மாநகராட்சியில், 407 அம்மா உணவகங்களும், பிற மாநகராட்சிகள் மற்றும் நகராட்சிகளில் 247 அம்மா உணவகங்களும் மற்றும் ஊரகப் பகுதிகளில் 4 அம்மா உணவகங்கள் என்று மொத்தம் 658 அம்மா உணவகங்கள் செயல்பட்டு வருகின்றன. இந்த உணவகங்களில் காலை ஒரு ரூபாய்க்கு இட்லி, ₹5 க்கு பொங்கல், மதியம் ₹3க்கு தயிர் சாதம், ₹5க்கு பலவகை சாதங்களும் விற்பனை செய்யப்படுகின்றன. சென்னை மாநகராட்சியில் உள்ள உணவகங்களில் மட்டும் இரவில் ₹3க்கு 2 சப்பாத்திகள்  விற்பனை செய்யப்படுகின்றன.சென்னையில் நாள் ஒன்றுக்கு 2.50 லட்சம் மக்கள் அம்மா உணவகங்களில் உணவு உட்கொள்கின்றனர். கடந்த ஆண்டு செப்டம்பர் மாதம் வரையில் 99.58 கோடி இட்லிகளும், 35.8 கோடி பலவகை சாதங்களும், 25.7 கோடி சப்பாத்திகளும் மலிவு விலையில் விற்பனை செய்யப்பட்டுள்ளதாக அரசு அதிகாரிகள் தெரிவித்தனர்.

இந்நிலையில், கட்டுமான தொழிலாளர்களுக்கு அம்மா உணவகத்தில் இலவச உணவு வழங்கப்படும் என்று முதல்வர் எடப்பாடி பழனிசாமி அறிவித்தார். இந்நிலையில் இதற்கான பணியை தொழிலாளர் நலத்துறை மற்றும் நகராட்சி நிர்வாகம் மற்றும் குடிநீர் வழங்கல் துறை தொடங்கியுள்ளது. இதுதொடர்பாக தொழிலாளர் நலத்துறை அதிகாரிகள் கூறியதாவது:

கட்டுமான தொழிலாளர்கள் நல வாரியத்தில் மொத்தம் 29 லட்சம் உறுப்பினர்கள் உள்ளனர். கட்டுமானத் தொழிலாளர்கள் நல வாரியத்தில் பதிவு செய்வதற்கு எந்த வித கட்டணமும் வசூலிக்கப்படுவதில்லை. கட்டுமான நிறுவனங்கள் செய்யும் பணிகள் மதிப்பீட்டுத் தொகையில் ஒரு சதவீத தொகையை வாரியத்திற்கு செலுத்த வேண்டும். இந்த ெதாகையை கொண்டு கட்டுமான தொழிலாளர்களுக்கு பல்வேறு உதவித் தொகை வழங்கப்படும். கட்டுமானத் தொழிலாளர் நல வாரிய அடையாள அட்டை உள்ளவர்கள் அதைக் காட்டி அம்மா உணவகத்தில் இலவசமாக உணவு உட்கொள்ளலாம். அவ்வாறு உணவு உட்கொண்டவர்களின் எண்ணிக்கை சம்பந்தப்பட்ட அறிக்கையை உள்ளாட்சி அமைப்புகள் கட்டுமானத் தொழிலாளர் நல வாரியத்திற்கு அனுப்பும். அதற்கான தொகையை நல வாரியம் சம்பந்தப்பட்ட உள்ளாட்சி அமைப்புகளுக்கு வழங்கும். இந்த திட்டத்தை கட்டுமான தொழிலாளர்களில் நலத் திட்டத்தில் சேர்ப்பதற்காக சட்ட திருத்தம் செய்யப்பட்டு அரசாணை வெளியிடப்பட்டுள்ளது. முதற்கட்டமாக சென்னை மாநகராட்சியில் மட்டும் இந்த திட்டம் செயல்படுத்தபட உள்ளது. இந்த திட்டம் எப்போது முதல் அறிமுகப்படுத்தப்படும் என்பது பின்னர் அறிவிக்கப்படும்.இவ்வாறு அவர் கூறினார்.

45 ஆயிரம் பேர்
சென்னை மாவட்டத்தில் 45 ஆயிரத்து 347 தொழிலாளர்கள் கட்டுமான நல வாரியத்தில் பதிவு செய்துள்ளனர். அதிகபட்சமாக, சேலம் மாவட்டத்தில் 1 லட்சத்து 95 ஆயிரத்து 344 பேர் நலவாரியத்தில் பதிவு செய்துள்ளனர். இரண்டாவதாக திருவண்ணாமலை மாவட்டத்தில் 1 லட்சத்து 84 ஆயிரத்து 747 பேர் பதிவு செய்துள்ளனர். குறைந்தபட்சமாக அரியலூர் மாவட்டத்தில் 12 ஆயிரத்து 888 பேர் உறுப்பினர்களாக உள்ளனர்.


மேலும் செய்திகள்

Like Us on Facebook Dinkaran Daily News
  • 16-02-2019

    16-02-2019 இன்றைய சிறப்பு படங்கள்

  • BrightBrussels

    ஒளியின் மாயாஜாலத்தை மக்களுக்கு காண்பிக்க கொண்டாடப்படும் பிரைட் பிரஸ்ஸல்ஸ் திருவிழா: பெல்ஜியத்தில் கோலாகலம்

  • francelemon

    பிரான்சில் நடைபெற்ற 86வது லெமன் திருவிழா : பழங்களை கொண்டு பிரம்மாண்ட சிற்பங்கள் வடிவமைப்பு

  • TitanicReplicaChina

    முழு அளவிலான டைட்டானிக் கப்பலை மீண்டும் கட்டமைத்து வரும் சீனா..: புகைப்பட தொகுப்பு

  • train18modi

    டெல்லியில் ட்ரெயின் 18 'வந்தேபாரத் எக்ஸ்பிரஸ்'- ஐ கொடியசைத்து துவக்கி வைத்தார் பிரதமர் மோடி

படங்கள் வீடியோ கல்வி சினிமா ஜோ‌திட‌ம்