அரூர்: தர்மபுரி மாவட்டம் அரூர் அடுத்த குடுமியாம்பட்டி கிராமத்தில் ஆண்டுதோறும் பொங்கல் பண்டிகை முன்னிட்டு, முயல் விடும் விழா நடைபெறுவது வழக்கம். இந்தாண்டு முயல் விடும் நிகழ்ச்சிக்காக, நேற்று காலை அப்பகுதியை சேர்ந்த இளைஞர்கள் ஊரில் உள்ள மாரியம்மன் கோயிலுக்கு சென்று, சுவாமியை வழிபட்ட பின், கோயிலில் இருந்த வலைகளை எடுத்துக் கொண்டு முயலை பிடிக்க வனப்பகுதிக்கு சென்றனர். அங்கு வலை மூலம் முயல் ஒன்றை பிடித்து வந்தனர். மாலை 6 மணிக்கு கோயில் அருகில் பெண்கள் பொங்கல் வைத்த பிறகு, சுவாமி ஊர்வலம் துவங்கியது. ஊர்வலத்தின் போது, காட்டிலிருந்து பிடித்து வந்த முயலுக்கு மாலை அணிவித்து, சிறப்பு பூஜை செய்யப்பட்டு, சுவாமியை சுற்றி மூன்று முறை வலம் வந்த பிறகு சிறிது தூரம் சென்று முயலை விட்டனர். அது துள்ளி குதித்து வனப்பகுதியை நோக்கி தப்பி ஓடியது. இவ்விழாவில், அருகில் உள்ள அச்சல்வாடி, ஓடசல்பட்டி உள்ளிட்ட கிராமங்களை சேர்ந்த ஆயிரத்திற்கும் மேற்பட்ட மக்கள் கலந்து கொண்டனர்.

இதுகுறித்து அப்பகுதி மக்கள் கூறுகையில், பொங்கல் முடிந்த மூன்றாவது நாள் முயல் விடும் நிகழ்ச்சி நடக்கும். வனப்பகுதியில் வலைகளை வைத்து ஒரே நாளில் முயல்களை பிடித்து வருவது இளைஞர்களுக்கு சவால் விடும் நிகழ்வாகவே கருதப்படுகிறது. கடந்த 2 தலைமுறைகளுக்கு மேலாக முயல் விடும் விழா நடந்து வருகிறது. இவ்விழாவின் போது விடப்படும் முயலை யாராவது பிடித்தால் அவர்களுக்கு ஊர் பஞ்சாயத்தில் அபராதம் விதிக்கப்படும். ஊர்மக்கள் அனைவரும் நலமாக இருக்க பாரம்பரியமாக இந்த விழா கொண்டாடப்பட்டு வருகிறது என்றனர்.