ஆலந்தூர்: நங்கநல்லூர், ஆலந்தூர், மூவரசன்பட்டு அரசு பள்ளி மாணவர்களுக்கு தமிழக அரசின் இலவச சைக்கிள் வழங்கும் விழா, நங்கநல்லூரில் உள்ள  நேரு அரசினர் பள்ளியில் நேற்று நடந்தது. ஆலந்தூர் தொகுதி எம்எல்ஏ தா.மோ.அன்பரசன், மாநிலங்களவை உறுப்பினர் ஆர்.எஸ்.பாரதி ஆகியோர் 10.30 மணிக்கு விழா மேடைக்கு வந்தனர். ஆனால், 11 மணி வரை நாடாளுமன்ற உறுப்பினர் கே.என்.ராமச்சந்திரன் வராததால், தா.மோ.அன்பரசன், ஆர்.எஸ்.பாரதி ஆகியோர் இலவச  சைக்கிள்களை மாணவர்களுக்கு வழங்கிவிட்டு சென்றனர். இதையடுத்து, 12 மணிக்கு எம்.பி கே.என்.ராமச்சந்திரன், முன்னாள் எம்.பி. சிட்லப்பாக்கம் ராஜேந்திரன், முன்னாள் எம்எல்ஏ வி.என்.பி.வெங்கட்ராமன் ஆகியோர் பள்ளிக்கு வந்து, சில மாணவர்களுக்கு சைக்கிள்களை வழங்கினர்.

இரு நிகழ்ச்சியிலும், மாவட்ட கல்வி அலுவலர் தாமோதரன், பள்ளி தலைமை ஆசிரியர் திருநாவுக்கரசு, பெற்றோர் ஆசிரியர் சங்க தலைவர் பரணிபிரசாத் ஆகியோர் கலந்து கொண்டனர்.
விழாவில், தங்களது பெயரை வாசிக்காமல் புறக்கணிப்பதாக அதிமுகவின் ஒரு தரப்பினர் பள்ளி வளாகத்திலேயே தகராறில் ஈடுபட்டதால் தள்ளு முள்ளு ஏற்பட்டது. நிர்வாகிகள் இரு தரப்பினரையும் சமாதானம் செய்து அனுப்பி வைத்தனர். இச்சம்பவத்தால்  அங்கு அரை மணிநேரம் பரபரப்பு ஏற்பட்டது.