புதுடெல்லி: கேரள வெள்ள நிவாரணத்துக்கு கூடுதலாக ₹3,048 கோடியை தேசிய பேரிடர் நிவாரண நிதியிலிருந்து மத்திய அரசு வழங்குகிறது. கேரளாவில் கடந்த ஆகஸ்ட் மாதம் பருவமழை அளவுக்கு அதிகமாக பெய்தது. இதனால் அங்கு வரலாறு காணாத வெள்ளப் பெருக்கு ஏற்பட்டது. இதில் 14 மாவட்டங்களில் கடும் பாதிப்பு ஏற்பட்டது. இதில் சிக்கி 488 பேர்  பலியாயினர். கேரளாவில் ஏற்பட்ட வெள்ள பாதிப்புக்கு மத்திய அரசு ₹4,700 கோடி இழப்பீடு வழங்க வேண்டும் என கேரள அரசு கேட்டிருந்தது.
உடனடியாக மத்திய உள்துறை அமைச்சர் ₹100 கோடி நிவாரணத்தை கடந்த ஆகஸ்ட் 12ம் தேதி அறிவித்தார்.

அதன் பின் பிரதமர் மோடி ₹500 கோடி நிவாரண நிதியை கடந்த ஆகஸ்ட் 18ம் தேதி அறிவித்தார். இது முன் பணம் என மத்திய அரசு கூறியிருந்தது. இந்நிலையில் வெள்ளம் மற்றும் நிலச்சரிவால் பாதிக்கப்பட்ட கேரளா, நாகலாந்து, அருணாச்சலப் பிரதேசம் மற்றும் ஆந்திராவுக்கு கூடுதலாக மத்திய நிதி வழங்குவது குறித்து மத்திய உள்துறை அமைச்சர் ராஜ்நாத் சிங்  தலைமையில் ஆலோசனை கூட்டம் டெல்லியில் நேற்று நடந்தது. இதில் நிதியமைச்சர் அருண் ஜேட்லி, வேளாண் அமைச்சர் ராதா மோகன் சிங், உட்பட பலர் கலந்து கொண்டனர். மத்தியக் குழு ஆய்வறிக்கையின் படி  கேரளாவுக்கு கூடுதலாக ₹3,048.39 கோடியும், புயலால் பாதிக்கப்பட்ட ஆந்திராவுக்கு ₹539.52 கோடியும், நாகாலாந்து ₹131.16 கோடியும் வழங்க அனுமதி வழங்கப்பட்டது.