ராய்ப்பூர்: பிரதமரின் அனைவருக்கும் வீடு திட்டத்தின் கீழ் சத்தீஸ்கர் மாநில மக்களுக்கு வீடுகள் வழங்க முன்னுரிமை வழங்கப்படும் என்று பாரதிய ஜனதா கட்சியின் தேசிய தலைவர் அமித் ஷா உறுதி அளித்துள்ளார். சத்தீஸ்கர் மாநிலம் ராய்ப்பூரில் நடைபெற்ற நிகழ்ச்சியில் பாரதிய ஜனதா தேர்தல் அறிக்கையை வெளியீட்டு அவர் உரையை நிகழ்த்தினார். முதலமைச்சர் ரமன் சிங் தலைமையில் சத்தீஸ்கர் மாநிலம் கடந்த 15 ஆண்டுகளாக முன்னேற்றத்தின் பாதையில் செல்வதாக அவர் பெருமிதம் தெரிவித்தார்.

நக்சல்கள் வழியில் காங்கிரஸ் கட்சி செல்வதாக குற்றம் சாட்டிய அமித் ஷா சத்தீஸ்கரில் நக்சல்கள் நடமாட்டம் வெகுவாக கட்டுப்படுத்தப்பட்டுள்ளது என்று தெரிவித்தார். தொடர்ந்து பேசிய பாரதிய ஜனதா கட்சியின் தேசிய தலைவர் அமித் ஷா 2022-ம் ஆண்டுக்குள் அனைவருக்கும் வீடு திட்டத்தின் கீழ் சத்தீஸ்கர் மக்களுக்கு வீடுகள் வழங்கப்படும் என்று உறுதியளித்தார்.

முன்னதாக நேற்று காங்கிரஸ் கட்சி தனது தேர்தல் அறிக்கையை வெளியிட்டது.  அதில் ஒவ்வொரு மாதமும் ரூ.1-க்கு 35 கிலோ அரிசி வழங்கப்படும் என்று உறுதி அளிக்கப்பட்டுள்ளது. 10 லட்சம் வேலை வாய்ப்புகளை ஏற்படுத்தப்படும் என்றும் உறுதியளிக்கப்பட்டுள்ளது. இதனிடையே இன்றுடன் தேர்தல் பிரச்சாரம் ஓய்கிறது. திங்கட்கிழமை 90 தொகுதிகளில் முதற்கட்டமாக 18 தொகுதிகளுக்கு தேர்தல் நடைபெற உள்ளது. 2-ம் கட்ட தேர்தல் 20-ம் தேதி நடைபெற உள்ளது.