சென்னை: லஞ்சம் வாங்கிக்கொண்டு விபசாரத்தை அனுமதித்த போலீஸ் இன்ஸ்பெக்டர்கள் மீது 2 மாதத்தில் விசாரணை நடத்தி உரிய நடவடிக்கை எடுக்க லஞ்ச ஒழிப்புத்துறை இயக்குநருக்கு சென்னை உயர்நீதிமன்றம் உத்தரவிட்டுள்ளது. சென்னை உயர்நீதிமன்றத்தில் அக்பர் அகமது என்பவர் தாக்கல் செய்துள்ள மனுவில் கூறியிருப்பதாவது: கடந்த மே மாதம் வெளியான பத்திரிக்கை செய்தியில் விபச்சார தடுப்புப் பிரிவு இன்ஸ்பெக்டர்கள் (சாம் வின்சன்ட் மற்றும் சரவணன்) விபசாரத்தை தொழிலாக செய்யும் புரோக்கர்களிடம் இருந்து லட்சக்கணக்கில் பணம் வாங்கிக்கொண்டு விபசாரத்தை அனுமதித்ததாக தெரிவிக்கப்பட்டிருந்தது. இதையடுத்து, சென்னை மாநகர போலீஸ் கமிஷனர் உத்தரவின் பேரில் இருவரும் வேறு காவல் நிலையத்துக்கு மாற்றப்பட்டனர். மக்களுக்காக பணியாற்ற இரு காவலர்களும் தகுதியற்றவர்கள், லஞ்சம் மற்றும் குற்ற செயல்களில் ஈடுபடுபவர்கள் எப்படி நேர்மையாக மக்கள் பணியாற்ற முடியும்.

 அதனால் சம்பந்தப்பட்ட காவல் ஆய்வாளர்களை இடைநீக்கம் செய்து அவர்கள் மீது சட்ட விரோத கடத்தல் சட்டத்தின் படி குற்ற வழக்கு பதிவு செய்து நடவடிக்கை எடுக்க வேண்டும் என புகார் அளித்தேன். அதன் மீது உயர் அதிகாரிகள் எந்த நடவடிக்கையும் எடுக்கவில்லை. எனவே,  நீதிமன்றம் சம்மந்தப்பட்ட அதிகாரிகளுக்கு தகுந்த உத்தரவிட வேண்டும் என குறிப்பிட்டிருந்தார்.  இந்த வழக்கு நீதிபதிகள் எஸ்.மணிக்குமார், சுப்ரமணியம் பிரசாத் ஆகியோர் முன்னிலையில் விசாரணைக்கு வந்தது. வழக்கை விசாரித்த நீதிபதிகள், மனுதாரர் புகாரில் கூறபட்டுள்ள குற்றச்சாட்டுகளின் அடிப்படையில் லஞ்சம் வாங்கிக்கொண்டு விபச்சாரத்தை அனுமதித்த இன்ஸ்பெக்டர்கள் மீது 2 மாதத்தில் விசாரணை நடத்தி உரிய நடவடிக்கை எடுக்க வேண்டும் என்று லஞ்ச ஒழிப்புத்துறை இயக்குநருக்கு உத்தரவிட்டனர்.