மதுரை: அதிமுகவுக்கு பெண் தலைமை ஏற்கும் காலம் வரும் என்று அமைச்சர் செல்லூர் ராஜூ பேசியது பரபரப்பை ஏற்படுத்தியது.  ஜெயலலிதா பேரவை சார்பில் அதிமுக அரசின் சாதனை விளக்க பெண்கள் சைக்கிள் பேரணி, மதுரை திருப்பரங்குன்றம் தொகுதியில் வரும் 24ம் தேதி நடக்க உள்ளது. இதில்  பங்கேற்கும் பெண்களுக்கான பயிற்சி முகாம்,  மதுரை ரிங்ரோட்டிலுள்ள திருமண மண்டபத்தில் நேற்று நடந்தது. முகாமுக்கு பேரவை மாநில செயலாளரும், அமைச்சருமான உதயகுமார் தலைமை வகித்தார். நிகழ்ச்சியில் அமைச்சர்கள் வளர்மதி, ராஜலட்சுமி, முன்னாள்  அமைச்சர்கள் கோகுல இந்திரா, வளர்மதி, மதுரை புறநகர் மாவட்ட செயலாளர் ராஜன்செல்லப்பா எம்எல்ஏ, விஜிலா சத்தியானந்த் எம்பி மற்றும் எம்எல்ஏக்கள் மாணிக்கம், பெரியபுள்ளான், சரவணன் உள்ளிட்ட நிர்வாகிகள்  பங்கேற்றனர்.

அமைச்சர் செல்லூர் ராஜூ பேசும்போது, ‘‘ஜெயலலிதாவுக்கு பிறகு இந்த கட்சியையும், ஆட்சியையும் முதல்வர் எடப்பாடி பழனிசாமி, துணை முதல்வர் ஓ.பன்னீர்செல்வம் வழி நடத்துகின்றனர். இந்த நல்லாட்சி தொடர  வேண்டும். பெண்களுக்கு தனி சிறப்பு உண்டு. ஆண்கள் வீட்டு வாசல் வரை தான் செல்லமுடியும். பெண்கள் வீட்டின் அந்தரங்க அறை, சமையல் அறை வரை செல்ல முடியும். இந்த இயக்கத்திற்கு பெண்களில் ஒருவர் தலைமை  ஏற்கும் காலம் வரும்’’ என்றார்.அமைச்சரின் பேச்சை கேட்டதும் மேடையில் அமர்ந்திருந்த அமைச்சர்கள், எம்பி, எம்எல்ஏக்கள் திகைத்தனர். ஏற்கனவே டி.டி.வி.தினகரன் அமைச்சர்களில் சிலர் ஸ்லீப்பர் செல்களாக உள்ளனர் என்று குறிப்பிட்டிருந்தார்.  இந்நிலையில் ‘பெண் தலைமை ஏற்பார்’ என அமைச்சர் கூறியது பரபரப்பை ஏற்படுத்தியது.