பெய்ஜிங் சீனாவில் நடைபெறும் டியான்ஜின் ஓபன் டென்னிஸ் தொடரின் மகளிர் ஒற்றையர் பிரிவு அரை இறுதியில் விளையாட, பிரான்ஸ் வீராங்கனை கரோலின் கார்சியா தகுதி பெற்றார். கால் இறுதியில் குரோஷியாவின் பெத்ரா மார்டிச்சுடன் நேற்று மோதிய கார்சியா 6-2 என்ற கணக்கில் முதல் செட்டை கைப்பற்றி முன்னிலை பெற்றார். இரண்டாவது செட்டிலும் அவர் 1-0 என முன்னிலை பெற்ற நிலையில், காயம் காரணமாக மார்டிச் விலகினார். இதையடுத்து கார்சியா அரை இறுதிக்கு முன்னேறினார். மற்றொரு கால் இறுதியில் செக் குடியரசின் கரோலினா பிளிஸ்கோவா  5-7, 6-0, 6-3 என்ற செட் கணக்கில் இங்கிலாந்தின் கேட்டி போல்ட்டரை 2 மணி, 7 நிமிடம் போராடி வென்று அரை இறுதிக்கு தகுதி பெற்றார்.

சுவிஸ் வீராங்கனை டிமியா பாஸ்கின்ஸி - அரினா சபலென்கா (பெலாரஸ்) இடையே நடந்த கால் இறுதி ஆட்டம் மிகவும் விறுவிறுப்பாக அமைந்தது. டை பிரேக்கர் வரை இழுபறியாக நீடித்த 2 செட்களிலும் பாஸ்கின்ஸி 7-6 (7-2), 7-6 (7-5) என்ற கணக்கில் போராடி வென்றார். இப்போட்டி 2 மணி, 16 நிமிடத்துக்கு நீடித்தது. கடைசி கால் இறுதியில் தைபே வீராங்கனை சூ வெய் சை 6-2, 4-0 என்ற நேர் செட்களில் எலிஸ் மெர்டன்சை (பெல்ஜியம், காயத்தால் விலகல்) வீழ்த்தினார்.