புதுடெல்லி: நீதிமன்றங்களில் தேங்கி கிடக்கும் வழக்குகளை விரைந்து முடிக்க நீதிபதிகள் வேலை நாட்களில் விடுமுறை எடுக்க வேண்டாம் என உச்சநீதிமன்ற தலைமை நீதிபதி ரஞ்சன் கோகோய் கட்டுப்பாடு விதித்துள்ளார். நாடு முழுவதும் உள்ள நீதிமன்றங்களில் வழக்குகள் பல ஆண்டுகளாக தீர்வு எட்டப்படாமல் தேங்கிக்கிடக்கின்றன. உச்சநீதிமன்றத்தில் 55,000 வழக்குகள் நிலுவையில் உள்ளதாக புள்ளி விவரங்கள் தெரிவிக்கின்றன. இதேபோன்று நாடு முழுவதும் உள்ள 24 உயர்நீதிமன்றங்களில் 32.04 லட்சம் வழக்குகளும், கீழமை நீதிமன்றங்களில் 2.77 கோடி வழக்குகளும் நிலுவையில் உள்ளதாகவும் தெரிவிக்கப்பட்டுள்ளது.

இதனால் நிலுவையில் உள்ள வழக்கை விரைந்து முடிக்க, நோ லீவ் பார்முலாவை உச்சநீதிமன்ற தலைமை நீதிபதி ரஞ்சன் கோகாய் கொண்டுவந்துள்ளார். அதன்படி அவசர காலங்களை தவிர நீதிமன்ற வேலை நாட்களில் நீதிபதிகள் விடுமுறை எடுப்பதை தவிர்க்க வேண்டும் என்ற கட்டுப்பாட்டை அவர் விதித்துள்ளார். மேலும் விடுமுறை எடுக்கும் நீதிபதிகளிடம் இருந்து வழக்குகள் தொடர்பான கோப்புகளை எடுத்து விடுமாறும் அவர் உத்தரவிட்டுள்ளதாக தகவல்கள் வெளியாகியுள்ளன.