மீனம்பாக்கம்: மத்திய இணை அமைச்சர் நாராயணசாமி, இன்று காலை சென்னையில் இருந்து விமானம் மூலம் டெல்லி புறப்பட்டு சென்றார். முன்னதான விமான நிலையத்தில் அவர் நிருபர்களுக்கு அளித்த பேட்டி: இலங்கை பிரச்சனையில் தமிழக மக்களுக்கும் திமுக தலைவர் கருணாநிதிக்கும் மன திருப்தி ஏற்படுத்தும் விதத்தில் மத்திய அரசு முடிவு எடுக்க உள்ளது. இதுபற்றி பிரதமர் மன்மோகன் சிங் விரைவில் அறிவிப்பார். அமெரிக்கா கொண்டு வந்துள்ள தீர்மானத்தில் திருத்தங்கள் கொண்டு வருவது பற்றி மத்திய அமைச்சரவைதான் முடிவு செய்ய வேண்டும். தனிப்பட்ட முறையில் கருத்து எதுவும் கூற முடியாது.

பா.ஜ.வை பொருத்தவரையில் இந்த விஷயத்தில் குட்டையை குழப்பி கொண்டிருக்கிறது. அதனால்தான் திமுக தலைவர் கருணாநிதி கூறியுள்ள கருத்துக்கு உடனடியாக வரவேற்பு தெரிவித்துள்ளது. காங்கிரஸ்  திமுக கூட்டணி உடையாதா என்று கடந்த 9 ஆண்டுகளாக பா.ஜ எதிர்பார்த்து கொண்டிருக்கிறது. பா.ஜ. எதிர்க்கட்சி. எனவே அவர்கள் தங்களுடைய வேலையை செய்கின்றனர். அதே நேரத்தில் நாங்கள் ஆளும் கூட்டணி. எனவே எங்களுடைய கடமையை நாங்கள் செய்வோம். இவ்வாறு நாராயணசாமி கூறினார்.