சென்னை: சென்னை திரு.வி.க.நகர் ஏழுமலை தெருவை சேர்ந்தவர் பாலசுப்பிரமணி (54). திருவொற்றியூர் காவல் நிலையத்தில் ஏட்டாக உள்ளார். இவர், நேற்று காலை ராயபுரம் மேம்பாலத்தில் பைக்கில் சென்றபோது, 2 பேர் விபத்தில் சிக்கியது போல் சாலையில் விழுந்து கிடந்தனர். இதை பார்த்த அவர், பைக்கை நிறுத்திவிட்டு அவர்களின் பக்கத்தில் சென்று பார்த்தார். உடனே அவர்கள், பாலசுப்பிரமணியிடம் இருந்த விலை உயர்ந்த செல்போனை பறித்துக்கொண்டு ஓடினர்.

அதிர்ச்சியடைந்த அவர், இருவரையும் துரத்தி சென்று ஒருவரை மடக்கி பிடித்தார். விசாரணையில், கார்த்திக் (30) என்பதும், திருமண மண்டபங்களில் துப்புரவு வேலை செய்வது, வேலை இல்லாத நேரத்தில் வழிப்பறியில் ஈடுபட்டு வந்ததும் தெரியவந்தது. அவர் கொடுத்த தகவலின்பேரில் பட்டினப்பாக்கம் திருமண மண்டபத்தில் பதுங்கி இருந்த சேலம் அடுத்த ஆத்தூரை சேர்ந்த சதீஷ் (19), திருச்சியை சேர்ந்த டேனியல் (28) ஆகியோரை போலீசார் கைது செய்தனர்.