SUN குழுமத்திலிருந்து வெளிவரும் காலை நாளிதழ்

ஆரோக்கியமான ஜனநாயகம்

2018-09-05@ 00:55:39

தமிழகத்தில், மத்திய அரசின் முக்கிய திட்டங்களான, கூடங்குளம் அணுமின் நிலைய விரிவாக்க திட்டம், தேனியில் நியூட்ரினோ திட்டம், தூத்துக்குடியில் ஸ்டெர்லைட் விரிவாக்க திட்டம், புதுக்கோட்டையில் ஹைட்ரோகார்பன் திட்டம், காவிரிப்படுகை கதிராமங்கலத்தில் எரிவாயு  எடுக்க ஆழ்கிணறுகள் தோண்டும் திட்டம், கடலூரில் பெட்ரோகெமிக்கல் திட்டம், மேற்கு மாவட்டங்களான சேலம், தர்மபுரி, கிருஷ்ணகிரி,  நாமக்கல் மாவட்டங்களில் விவசாய விளைநிலங்களில் கெயில் எரிவாயு குழாய் பதிக்கும் திட்டம், தென்மாவட்டங்களில் வேலைவாய்ப்பு மற்றும்  தொழில்வளத்தை தடுக்கும் வகையில் சேது சமுத்திர திட்டம் ரத்து என  தமிழகத்தின் பல மண்டலங்களை தேர்வுசெய்து, மக்களை ஆபத்தான குழியில் தள்ளுகிற முயற்சியில் மத்திய அரசு ஈடுபட்டுள்ளது என்பது தமிழக அரசியல் கட்சி  தலைவர்களின் பலத்த குற்றச்சாட்டு.

ரூபாய் நோட்டு மதிப்பிழப்பு விவகாரம், ஜி.எஸ்.டி வரி அமல், பசுவதை தடை சட்டம், இதன் நீட்சியாக மாட்டுக்கறிக்கு தடை, கட்டாய நீட் தேர்வு, விண்ணை முட்டும் பெட்ரோல், டீசல் விலை உயர்வு ஆகியவற்றுக்கும் பலத்த எதிர்ப்பு கிளம்பியுள்ளது. சேலம்-சென்னை இடையே ஆறுவழி பசுமைச்சாலை திட்டத்துக்கு விளைநிலம் கையகப்படுத்தும் நடவடிக்கைக்கும் விவசாயிகளிடையே எதிர்ப்பு கிளம்பியுள்ளது. மத்திய அரசுக்கு எதிராக, ஜனநாயக ரீதியாக கருத்து தெரிவிப்போரை மாவோயிஸ்ட்கள் என முத்திரை குத்தி, அவர்களை சிறையில் அடைப்பதற்கும் எதிர்ப்பு கிளம்பியுள்ளது.  இந்த கோரிக்கைகளை முன்வைத்து, அரசியல் கட்சிகள் மற்றும் பொதுநல அமைப்புகள் நடத்தும் போராட்டங்களையும் தாண்டி, தற்போது தனி மனித போராட்டமும் விஸ்வரூபம் எடுக்க துவங்கியுள்ளது. தூத்துக்குடி விமான நிலையத்தில் நேற்று முன்தினம் நடந்த சம்பவமே இதற்கு சான்று. தூத்துக்குடியை சேர்ந்த ஆராய்ச்சி படிப்பு மாணவி சோபியா, தனி ஆளாக நின்று, கோஷம் எழுப்பி, சிறை சென்றுள்ளார். அதேவேகத்தில், நீதிமன்ற உத்தரவுப்படி, ஜாமீனில் வெளியே வந்துள்ளார்.

ஜாமீன் மனுவை பரிசீலனை செய்த நீதிபதி, பொதுஇடங்களில் இப்படி நடந்து கொள்ளக்கூடாது, ஜனநாயக ரீதியாக போராட்டம் நடத்த விரும்புவோர், காவல்துறையினரின் அனுமதி பெற்று, அதற்கென ஒதுக்கப்பட்ட இடத்தில், மக்களுக்கு எவ்வித பாதிப்பும் இன்றி, அமைதியான முறையில் போராட்டம் நடத்தலாம் என அறிவுரை வழங்கியுள்ளார். மக்களுக்கு ஒவ்வாத மத்திய-மாநில அரசுகளின் திட்டங்களை எதிர்த்து, ஜனநாயக ரீதியில் போராட்டம் நடத்த ஒவ்வொரு தனி மனிதனுக்கும் முழுஉரிமை உள்ளது. இதுவே, ஜனநாயக நாட்டில், சாமானிய மக்களுக்கு வழங்கப்பட்டுள்ள அடிப்படை உரிமை. கருத்து சுதந்திரம் காக்கப்பட வேண்டும். கருத்துக்கு எதிர்கருத்து தேவை. அது தான் ஆரோக்கியமான ஜனநாயகம்.


மேலும் செய்திகள்

Like Us on Facebook Dinkaran Daily News
  • SouravGangulyBCCI

    பிசிசிஐ அமைப்பின் 39வது தலைவராக முன்னாள் கேப்டன் சவுரவ் கங்குலி பதவியேற்பு..: புகைப்படங்கள்

  • SkyCityFireAuckland

    நியூசிலாந்தில் புதிதாக கட்டப்பட்டு வந்த மாநாடு மையத்தில் 2வது நாளாக பற்றி எரியும் தீ..: அப்பகுதி முழுவதும் கரும்புகை மூட்டம்!

  • NorthKarnatakaRain23

    கர்நாடகாவில் மீண்டும் கொட்டித் தீர்க்கும் கனமழை..: 100க்கும் மேற்பட்ட கிராமங்கள் வெள்ளத்தில் மூழ்கின

  • DiwaliPrep2k19

    நெருங்கி வரும் தீபாவளி...: விளக்குகள் தயாரிக்கும் பணிகள் தீவிரம்...பட்டாசு, பரிசுப் பொருட்கள் விற்பனை படுஜோர்!

  • DanishLightHouse

    கடலரிப்பினால் நகர்த்தி வைக்கப்படும் 120 ஆண்டுகள் பழமையான கலங்கரை விளக்கம்...: டென்மார்க்கில் ஆச்சரியம்!

படங்கள் வீடியோ கல்வி சினிமா ஜோ‌திட‌ம்