லக்னோ: ஆசிய விளையாட்டுப் போட்டிக்காக உத்தரப்பிரதேச மாநிலம் லக்னோவில் நடந்த பயிற்சி முகாமில் பங்கேற்ற இந்திய மல்யுத்த வீராங்கனை வினீஷ் போகத் அளித்த பேட்டியில் கூறியிருப்பதாவது: மல்யுத்த வீரர்கள் ஒலிம்பிக்சில் பதக்கம் வெல்ல வேண்டுமென நாடே எதிர்பார்க்கிறது. ஆனால், நாங்கள் பயிற்சி செய்வதற்கான வசதிகளில் எந்த முன்னேற்றமும் இல்லை. சரியான வசதிகள் இல்லாத காரணங்களால் பயிற்சியிலேயே காயம் ஏற்படவும், போட்டி களத்தில் சூழலே மாறுவதால் தடுமாற்றம் ஏற்படவும் வாய்ப்புகள் உள்ளன.

லக்னோவில் பயிற்சி முகாம் நடந்த இடம் மிகவும் வெப்பச்சூழல் மிகுந்ததாக இருந்தது. உணவு உள்ளிட்ட விஷயங்கள் தரமாக இருந்தாலும், பயிற்சிக்கான களம் உள்ளிட்ட பிற விஷயங்கள் மற்ற நாடுகளுக்கு இணையாக வழங்கப்படுவதில்லை. பல சமயம் மின்தடை ஏற்பட்டது. இதனாலேயே சில சமயங்களில் பயிற்சியை தவிர்த்தேன். நாங்கள் வேறென்ன செய்ய முடியும்? இவ்வாறு அவர் ஆதங்கப்பட்டுள்ளார்.