நாகை:நாகை அருகே சாராய வியாபாரியை சுற்றி வளைத்து சரமாரியாக பொதுமக்கள் தாக்கினர். இதில் ஒரு பைக்கு தீ வைத்து எரிக்கப்பட்டது. மேலும் 1000 லிட்டர் சராயம் அழிக்கப்பட்டது. நாகை ஒன்றியம் பாப்பாக்கோவில் கருவைகாட்டு பகுதிகளில் கள்ளச்சாராய விற்பனை தொடர்ந்து நடைபெற்று வருகிறது. கள்ளச்சாராய விற்பனையில் சிறுவர்கள் ஈடுபடுத்தப்படுவதாக புகார்கள் வந்தன. கள்ளச்சாராயத்தை குடிக்கும் அந்த பகுதியை சேர்ந்த கூலித்தொழிலாளிகள் தங்களுக்குள் சண்டை இடுவதுடன், அந்த வழியாக கல்லூரிக்கு செல்லும் மாணவிகளை கிண்டலும் செய்து வருகிறார்கள். இதனால் ஆத்திரமடைந்த பொதுமக்கள் கள்ளச்சாராய விற்பனையை நிறுத்த வேண்டும் என்று எச்சரித்தனர். இதைக்கேட்டு ஆத்திரமடைந்த சாராய வியாபாரிகள் அரிவாள், கம்பால் நேற்று முன்தினம் இரவு பொதுமக்களை தாக்க தொடங்கினர். இதனால் சாராய வியாபாரிகளுக்கும் பொதுமக்களுக்கும் இடையே திடீர் மோதல் ஏற்பட்டது.

இதில் ஒருவருக்கு அரிவாள் வெட்டும், 10க்கும் மேற்பட்டவர்கள் படுகாயமும் அடைந்தனர். ஆத்திரமடைந்த பொதுமக்கள், சாராய வியாபாரிகளின் வீடுகளில் பதுக்கி வைக்கப்பட்டிருந்த சுமார் 1000 லிட்டர் கள்ளச்சாராய மூட்டைகளை பறிமுதல் செய்து சாலையில் போட்டு உடைத்தனர். எங்கள் கிராமத்தில் தொடர்ந்து கள்ளச்சாராயம் விற்பனை செய்யப்பட்டால் நாங்கள் கிராமத்தை விட்டு வெளியேற போவதாக பொதுமக்கள் எச்சரிக்கை விடுத்தனர். இதுபற்றிய தகவல் கிடைத்தும் நாகை டவுன் போலீசார் சம்பவ இடத்திற்கு விரைந்து சென்றனர். அவர்கள் பொதுமக்களை சமரசம் செய்தனர். இதுதொடர்பாக சாராய வியாபாரிகள் 3 பேரை பிடித்து சென்று விசாரிக்கின்றனர். பொதுமக்களுக்கும் சாராய வியாபாரிகளுக்கும் இடையே மோதல் ஏற்பட்ட சம்பவம் நாகையில் பரபரப்பை ஏற்படுத்தி உள்ளது.