SUN குழுமத்திலிருந்து வெளிவரும் காலை நாளிதழ்

யானைகள் வழித் தடத்தில் உள்ள 27 ரிசார்ட்டுகளுக்கு சீல் வைக்க வேண்டும்: உச்ச நீதிமன்றம் அதிரடி உத்தரவு

2018-08-10@ 00:36:45

ஊட்டி: முதுமலை புலிகள் காப்பகத்துக்கு உட்பட்ட பகுதிகளில் யானை வழித்தடங்களில் அனுமதி பெறாமல் கட்டப்பட்டுள்ள 27 விடுதிகளுக்கு 48 மணி நேரத்தில் சீல் வைக்கும்படி உச்ச நீதிமன்றம் அதிரடியாக  உத்தரவிட்டுள்ளது. இந்த உத்தரவை நிறைவேற்றுவது தொடர்பாக நீலகிரி மாவட்ட கலெக்டர் ஆலோசனை நடத்தினார்.நீலகிரி மாவட்டம், முதுமலை புலிகள் காப்பகத்திற்குட்பட்ட சீகூர், சிங்காரா மற்றும் முதுமலை வனப்பகுதிகளில் ஏராளமான காட்டு யானைகள் உள்ளன. யானைகளின்  வழித்தடங்களாக மசினகுடி, மாவநல்லா, வாழைத்தோட்டம்,  பொக்காபுரம் போன்ற பகுதிகள் இருந்து வருகின்றன. இப்பகுதியில் 300க்கும் மேற்பட்ட தனியார் காட்டேஜ், ரிசார்ட்டுகள் உள்ளன. பெரும்பாலான ரிசார்ட், நில உரிமையாளர்கள் வன விலங்குகள் தங்கள் நிலங்களுக்குள்  நுழையாமல் இருக்க தடுப்பு சுவர்கள், முள் வேலிகள் மற்றும் மின் வேலிகளை அமைத்திருந்தனர். இதனால், யானைகளின் வழித்தடங்கள் மறிக்கப்பட்டு யானைகள் உணவிற்காகவும், இனப்பெருக்கத்திற்காகவும் இடம் பெயர  முடியாத சூழ்நிலை ஏற்பட்டது. இதையடுத்து, சென்னை வக்கீல் யானை ராஜேந்திரன் உயர் நீதிமன்றத்தில் தாக்கல் செய்த மனுவில், ‘மசினக்குடி சுற்று பகுதிகளில் யானை வழித்தடங்கள் மறிக்கப்பட்டுள்ளன. எனவே,  அப்பகுதியில் யானை வழித்தடங்களில் உள்ள ரிசார்ட்டுகள் மற்றும் விவசாயிகளை அகற்ற வேண்டும்’ என குறிப்பிட்டிருந்தார்.

 வழக்கை விசாரித்த நீதிமன்றம் இது குறித்து விசாரிக்க உயர் அதிகாரிகள் கமிட்டியை நியமித்து பொதுமக்களின் ஆட்சேபனைகளை கேட்க உத்தரவிட்டது. இதையடுத்து, 2010ல் கருத்து கேட்பு கூட்டம் நடந்தது. சென்னை உயர்  நீதிமன்றம் அமைத்த கமிட்டி பொதுமக்களிடம் மனுக்களை பெற்றது. பின் யானைகள் வழித்தடம் தொடர்பான வரைபடம் வெளியிடப்பட்டது. கடந்த 8 ஆண்டுகளாக யானைகள் வழித்தட பகுதிகளில் உள்ள காட்டேஜ்,  ரிசார்ட்டுக்களின் வேலிகள் மட்டுமே அகற்றப்பட்டன. கட்டிடங்கள் ஏதும் அகற்றப்படவில்லை. இதையடுத்து, பலரும் உச்ச நீதிமன்றத்தை நாடினர். இந்த வழக்கு உச்ச நீதிமன்றத்தில் நீதிபதிகள் மதன் பி லோகூர், அப்துல் நசீர்,  தீபக் குப்தா ஆகிய 3 பேர் கொண்ட அமர்வு முன் நேற்று விசாரணைக்கு வந்தது. அப்போது நீதிபதிகள் பிறப்பித்த உத்தரவில், ‘மசினகுடி மற்றும் சுற்றுப்புற  பகுதிகளில் யானை வழித்தடமாக கண்டறியப்பட்டுள்ள பகுதிகளில்  விதிமுறைகளை மீறி  கட்டப்பட்டுள்ள 27 கட்டிடங்களை 48 மணி நேரத்திற்குள் மாவட்ட நிர்வாகம்  மூடி சீல் வைக்க வேண்டும். மேலும், 300க்கும் மேல் கட்டப்பட்டுள்ள கட்டிடங்களின் உரிமையாளர்கள் அனுமதி பெற்றிருந்தால்,  அதற்கான ஆவணங்களை 48 மணி நேரத்திற்குள் (நேற்று முதல்) மாவட்ட நிர்வாகத்திடம் சமர்ப்பிக்க வேண்டும். 48 மணி நேரத்திற்குள் அனுமதி பெற்றதற்கான சான்றுகள் அளிக்காவிட்டால் கட்டிடங்களை அகற்ற வேண்டும்’  என தெரிவித்தனர்.

கலெக்டர் ஆலோசனை
உச்ச நீதிமன்ற உத்தரவை தொடர்ந்து, நீலகிரி மாவட்ட கலெக்டர் இன்னசென்ட் திவ்யா அதிகாரிகளுடன் நேற்று அவசர ஆலோசனை நடத்தினர். இன்று சீல் வைப்பது தொடர்பான நடவடிக்கைகள் எடுக்கப்படும் என கூறப்படுகிறது.  இந்நிலையில் காட்டேஜ், ரிசார்ட் உரிமையாளர்கள் அனுமதி பெற்றுள்ள சான்றுகளை மாவட்ட நிர்வாகத்திடம் காண்பித்தால் மட்டுமே தாக்குப் பிடிக்கும். இல்லையேல் மசினகுடி மற்றும் சுற்றுவட்டார பகுதிகளில் உள்ள அனுமதி  பெறாமல் உள்ள ஏராளமான காட்டேஜ் மற்றும் ரிசார்ட்கள் அகற்றப்படும். 


மேலும் செய்திகள்

Like Us on Facebook Dinkaran Daily News
  • 19-12-2018

    19-12-2018 இன்றைய சிறப்பு படங்கள்

  • china_cloning11

    செல்லப்பிராணிகளுக்கான குளோனிங் சேவை வழங்கும் சீன ஆய்வகம்!!

  • snow_river_falls11

    மார்கழி துவங்கியுள்ள நிலையில், சென்னையை வாட்டி வதைக்கும் பனிப்பொழிவு

  • christmas_planeealm1

    உலகின் பிரமாண்ட ஒளி கண்காட்சி : பன்முக வண்ண கிறிஸ்துமஸ் விளக்குகளால் ஜொலிக்கும் விமானம்

  • sutrula_12Icehotel1

    சுற்றுலா பயணிகளை குளிர்விக்கும் பனிக்கட்டி ஹோட்டல்.! : சுவிடனில் ருசிகரம்

படங்கள் வீடியோ கல்வி சினிமா ஜோ‌திட‌ம்