விருதுநகர்: தள்ளாடும் வயதில் சாதித்து வருகிறார் விருதுநகரைச் சேர்ந்த 70 வயது முதியவர் இன்பராஜ். உத்வேகத்திலும் ஆர்வத்திலும் இளைஞர்களுடன் போட்டிப் போடும் இந்த முதிய இளைஞர் 2014ம் ஆண்டு மலேசியாவில் நடந்த தடகள சாம்பியன்ஷிப் போட்டிகளில் முதியோருக்கான பிரிவில் 4வது இடம்பெற்றவர் ஆவார்.

சென்னை, விருதுநகர், சிவகாசி ஆகிய இடங்களில் நடந்த முழு மாரத்தான் போட்டிகளில் பங்கேற்று சக ஓட்டக்காரர்களை வியக்கவைத்த இவர், 70 வயதிலும் 5000 மீட்டர், 10,000 மீட்டர் ஓட்டங்களில் பங்கேற்று அனைவரையும் அசத்தி வருகிறார். முன்னாள் உடற்கல்வி இயக்குனரான இந்த முதியவர் நாள்தோறும் விளையாட்டு அரங்கத்திற்கு வந்து பயிற்சி செய்து இளைஞர்களுக்கு ஊக்கம் அளிப்பதை முக்கிய பணியாக மேற்கொண்டு வருகிறார். இதுவரை எந்த நோயும் தன்னை அணுகவில்லை எனக்கூறும் இந்த முதிய இளைஞர் நோயற்ற வாழ்வே குறைவற்ற செல்வம் என கூறியுள்ளார்.