புதுடெல்லி: ஆதார் அட்டையில் புதிதாக அறிமுகப்படுத்தப்பட உள்ள முகத்தை அடையாளம் காணும் வசதி மேலும் ஒரு மாதம் தாமதமாகும்.
தேசிய அடையாள அட்டையான ஆதார் அட்டை உதவியுடன் பல்வேறு நலத்திட்டங்கள் வழங்கப்படுகின்றன. இந்த அட்டை வழங்கும் பணியை உதய் என்ற அமைப்பு செயல்படுத்தி வருகிறது. இந்தியாவில் 121.17 கோடி பேர் ஆதார் அட்டை பெற்றுள்ளனர். இந்த அட்டையில் சம்மந்தப்பட்ட நபரின் கைரேகை, கருவிழி ஆகியவை இடம் பெற்றுள்ளது. இதில் வயதானவர்கள், கடின உழைப்பாளிகள் உள்ளிட்டோருக்கு கைரேகை அழிந்து காணப்படுவதால் அவர்களின் அடையாளத்தை சரிபார்ப்பது சிரமமாக உள்ளதாக புகார் கூறப்பட்டது. இதனால் உதய் அமைப்பு, முகத்தை அடையாளம் காணும் வசதியும் கூடுதலாக அறிமுகப்படுத்தப்படும் என்று இந்த ஆண்டு தொடக்கத்தில் அறிவித்தது.

இந்த திட்டம் வரும் ஜூலை 1 முதல் அமலுக்கு வரும் எனவும் தெரிவித்திருந்தது. இந்த நிலையில் இந்த புதிய வசதியை அறிமுகம் செய்ய கூடுதல் கால அவகாசம் தேவை என்பதால் இந்த வசதி அறிமுகப்படுத்துவது தாமதமாகும் என உதய் அமைப்பின் தலைமை நிர்வாக அதிகாரி அஜய் பூஷன் பாண்டே தெரிவித்துள்ளார். இது தொடர்பாக அவர் கூறியதாவது: ஆதார் அடையாள அட்டையில் முகத்தை அடையாளம் காணும் புதிய முறையை சிறப்பானதாக தர விரும்புகிறோம். புதிய தொழில்நுட்பத்தை அறிமுகப்படுத்துவதால் ஏற்கனவே அறிவித்த காலத்திற்குள் அறிமுகப்படுத்த முடியாத நிலை உள்ளது. ஆகஸ்ட் 1ம் தேதி முதல் இந்த திட்டம் செயல்படுத்தப்படும். இவ்வாறு அவர் தெரிவித்தார்.