மும்பை: வடமாநிலங்களில் ஒருசில பகுதிகளில் தேவை அதிகரித்ததே தற்காலிக பணத்தட்டுப்பாட்டுக்கு காரணம் என்று பாரத ஸ்டேட் வங்கி தலைவர் ரஜ்னிஸ் குமார் தெரிவித்துள்ளார். முறையான பண மேலாண்மை வழிகளை கையாண்டால் இத்தகைய பிரச்சனைகள் தவிர்க முடியும் என்று அவர் தெரிவித்துள்ளார். டெல்லி, மத்திய பிரதேசம், பீகார், தெலங்கானா உள்ளிட்ட மாநிலங்களில் கடந்த மூன்று நாட்களாக ஏ.டி.எம்.யில் பணம் கிடைக்காததால் அன்றாட செலவுகளை மேற்கொள்ள முடியாமல் தவித்து வருகின்றனர். இதை தொடர்ந்து பிற மாநிலங்களில் இருந்து பணத்தட்டுப்பாடு ஏற்பட்டுள்ள மாநிலங்களுக்கு பணத்தை எடுத்துச் செல்ல ரிசர்வ் வங்கி நடவடிக்கை எடுத்துள்ளதாக கூறப்படுகிறது.

500 ரூபாய் நோட்டுகளை கூடுதலாக அச்சிட முடிவு

ஏடிஎம்-களில் பணத்தட்டுப்பாட்டை தீர்க்க 500 ரூபாய் நோட்டுகளை 5 மடங்கு கூடுதலாக அச்சிட ரிசர்வ் வங்கி முடிவு செய்துள்ளதாக தகவல் வெளியாகியுள்ளது.  அடுத்த 2 நாட்களில் நாளொன்றுக்கு ரூ.2,500 கோடி மதிப்பிலான 500 ரூபாய் நோட்டுகளை புழக்கத்தில் விட நிதித்துறை முடிவு செய்துள்ளதாகவும் தெரிவிக்கப்பட்டுள்ளது. கடந்த ஒரு மாதத்தில் ரூ.7,500 கோடிக்கு 500 ரூபாய் நோட்டுகள் புழக்கத்தில் விடப்படும் என மத்திய நிதித்துறை தகவல் தெரிவித்துள்ளது. அதிக மதிப்புள்ள 2000 ரூபாய் நோட்டுகளின் பயன்பாட்டை குறைக்க ரிசர்வ் வங்கி திட்டம் எனத் தகவல் வெளியாகியுள்ளது.