திருவாரூர் : அமெரிக்க நிறுவனம் வழங்கும் விருதுக்கு தமிழக அரசுப் பள்ளி மாணவி தேர்வாகி உள்ளார். திருவாரூர் மாவட்டம் காலாட்சேரி மேற்கு கிராமத்தில் உள்ள அரசு பள்ளியில் 8ம் வகுப்பு படித்து வருபவர் பானுப்ரியா. அமெரிக்கா நிறுவனம் நடத்திய சமூதாய பங்களிப்பு குறித்த போட்டியில் பங்கேற்றார். மாதவிடாயும் மூடதனமும் என்ற தலைப்பில் ஆய்வு கட்டுரையை அவர் சமர்ப்பித்தார். நாடு முழுவதும் இருந்து, 4,400 பேர் விண்ணப்பித்தனர். அவர்களுக்கு, குறிப்பிட்ட தலைப்பில், கட்டுரை மற்றும் நேர்முக போட்டிகள் நடத்தப்பட்டன. இறுதி போட்டி, டெல்லியில் நடந்தது.

திருவாரூரைச் சேர்ந்த, அரசு பள்ளி மாணவி, பானுபிரியா வெற்றி பெற்று, தங்கப் பதக்கம் வென்றார். டெல்லியில் நடந்த விழாவில், 'பேட்மின்டன்' வீராங்கனை, சாய்னா நேவால், பரிசு வழங்கினார். இந்த போட்டியில், டெல்லி மாணவி, இஷிதா மங்க்ளாவும் தேர்வு செய்யப்பட்டுள்ளார். இதையடுத்து இவ்விருவரும் இம்மாதம் 26ம் தேதி வாஷிங்டனில் நடக்கும் விருது வழங்கும் விழாவில் மாணவி பானுப்ரியா பங்கேற்க உள்ளார்.

வரும் 24ம் தேதி அமெரிக்காவுக்கு செல்ல வேண்டிய மாணவி பானுப்ரியாவுக்கு இன்னும் விசா கிடைக்கவில்லை. இது தொடர்பாக சென்னை தலைமை செயலகத்தில் பள்ளிக் கல்வித்துறை செயலர் பிரதீப் யாதவை மாணவி பானுப்ரியாவும், அவரது ஆசிரியரும் சந்தித்து விசா கிடைக்க நடவடிக்கை எடுக்க வேண்டும் என கோரிக்கை விடுத்துள்ளார்.