SUN குழுமத்திலிருந்து வெளிவரும் காலை நாளிதழ்

ஒகி புயலை தொடர்ந்து குமரிக்கு மீண்டும் ஆபத்து: 600 மீனவர் நடுக்கடலில் சிக்கினர்

2018-03-14@ 00:02:35

நாகர்கோவில்: கன்னியாகுமரி அருகே காற்றழுத்த தாழ்வுநிலை நீடித்து வரும் நிலையில், 51 விசைப்படகுகளில் நடுக்கடலில் மீன் பிடிக்கச் சென்ற 600க்கும் மேற்பட்ட குமரி மாவட்ட மீனவர்கள் சிக்கி தவிப்பதாக தகவல் வெளியாகியுள்ளன. அவர்களை பாதுகாப்பாக மீட்பதற்கு அரசு நடவடிக்கை எடுத்து வருகிறது. இந்திய பெருங்கடலில் தெற்கு இலங்கைக்கும் மாலத்தீவு மற்றும் கன்னியாகுமரிக்கும் இடையே நிலைகொண்டிருந்த காற்றழுத்த தாழ்வு நிலை அப்பகுதியில் தொடர்ந்து மையம் கொண்டுள்ளது. இது அடுத்த 24 மணி நேரத்தில் மேற்கு - வடமேற்கு திசை நோக்கி தென்கிழக்கு அரபிக்கடல் (மாலத்தீவு) நோக்கி நகரும் என்று இந்திய வானிலை ஆய்வு மையம் தெரிவித்துள்ளது. நேற்று மாலை நிலவரப்படி திருவனந்தபுரத்தில் இருந்து 390 கி.மீ தெற்கு-தென்மேற்கு திசையில் நிலைகொண்டுள்ள காற்றழுத்த தாழ்வு மண்டலம் வடமேற்கு திசையில் வலுப்பெற்று நகரும் என்றும் வானிலை மையத்தால் தெரிவிக்கப்பட்டுள்ளது.

 இதைத்தொடர்ந்து இந்திய கடல் தகவல் சேவை மையம் வெளியிட்டுள்ள அறிவிப்பில், காற்றழுத்த தாழ்வுநிலை காரணமாக தமிழகத்தில் கன்னியாகுமரி மாவட்டம் குளச்சல் முதல் ராமநாதபுரம் மாவட்டம் கீழக்கரை வரையிலான கடல் பகுதியில் 7 முதல் 9 அடி உயரத்திற்கு பேரலைகள் எழக்கூடும். மணிக்கு 50 கி.மீ வேகத்திலும், சில நேரங்களில் 65 கி.மீ வேகத்திலும் பலத்த சூறாவளி காற்றும் வீசும். எனவே மீனவர்கள் தென் தமிழக கடலோர பகுதிகள், மன்னார் வளைகுடா, கன்னியாகுமரி கரையோர பகுதிகள், இந்திய பெருங்கடல் மற்றும் மாலத்தீவு பகுதிகளில் மீன்பிடிக்க செல்லவேண்டாம் என்றும் தெரிவிக்கப்பட்டுள்ளது. இதனை போன்று கேரளாவில் விழிஞ்ஞம் முதல் காசர்கோடு வரையிலான கடலோர பகுதிகளில் அசாதாரணமான காற்றும், 8 முதல் 10 அடி உயரத்திற்கு அலைகள் எழும் வாய்ப்பு இருப்பதால் மீனவர்கள் மீன்பிடிக்க செல்லவேண்டாம் எனவும் தெரிவிக்கப்பட்டுள்ளது.

மினிக்காய், லட்சத்தீவு பகுதிகளிலும் மீனவர்களுக்கு இதுபோன்ற அறிவிப்பு வெளியிடப்பட்டுள்ளது. இதனால் ஆழ்கடலுக்கு மீன்பிடிக்க சென்ற மீனவர்கள் மீன்பிடிக்காமல் கரை திரும்பிய வண்ணம் உள்ளனர். குமரி மாவட்டத்தில் இருந்து 400க்கும் ேமற்பட்ட விசைப்படகுகளில் 4 ஆயிரத்திற்கும் மேற்பட்ட மீனவர்கள் மீன்பிடிக்க சென்ற நிலையில் இவர்கள் குமரி மாவட்ட கடலோர பகுதிகளில் மட்டுமின்றி கேரள கடலோர பகுதிகளான கொல்லம், கொச்சி உள்ளிட்ட துறைமுக பகுதிகளிலும், லட்சத்தீவு நோக்கியும் கரை திரும்பி வருகின்றனர். அதில் லட்சத்தீவு அருகே உள்ள கல்பேனி பகுதியில் 40 படகுகளும், மால்பின் பகுதியில் ஏராளமான படகுகளும், கல்பட்டி பகுதியில் 30 படகுகளும், கார்வார் துறைமுக பகுதியில் 20 படகுகளும் கரை சேர்ந்துள்ளன. இவற்றில் ஆயிரத்திற்கும் மேற்பட்ட மீனவர்கள் தீவு பகுதிகளில் பாதுகாப்பாக உள்ளனர்.

இருப்பினும் வடக்கு அரபிக்கடல் பகுதியில் 51 விசைப்படகுகளில் சென்ற 600க்கும் மேற்பட்ட மீனவர்கள் கரை திரும்பாமல் நடுக்கடலில் சிக்கி தவிப்பதாக கண்டறியப்பட்டுள்ளது. இவர்கள் குமரி மாவட்டம் தூத்தூர் மற்றும் சின்னத்துறை பகுதிகளை சேர்ந்தவர்கள். இதற்கிடையே நேற்று காலை கடலோர காவல்படைக்கு சொந்தமான விமானம் மூலம் கொச்சி பகுதியில் வான்வெளியில் சென்று லட்சத்தீவு பகுதியில் மீன்பிடித்துக்கொண்டிருக்கும் மீனவர்களுக்கு காற்றழுத்த தாழ்வு நிலை தொடர்பான எச்சரிக்கை தகவல் தெரிவிக்கப்படும் என்று மீன்துறை அதிகாரி சமீரான் தெரிவித்துள்ளார்.
அரசு ஆலோசனை: இதுகுறித்து தமிழக வருவாய் துறை அமைச்சர் உதயக்குமார் நேற்று சென்னை, எழிலகத்தில் உள்ள மாநில பேரிடர் மீட்பு மையத்தில் உயர் அதிகாரிகளுடன் ஆலோசனை நடத்தினார். அவர் நிருபர்களிடம் கூறியதாவது:   காற்றழுத்த தாழ்வு நிலை உருவாகுவதற்கு முன்பே கன்னியாகுமரி மாவட்டத்தில் இருந்து 553 பெரிய படகுகள் (மல்டிடே பிஷ்சிங் படகு) கடலுக்குள் சென்றுள்ளது.

மீன்வளத்துறை சார்பில் விடுக்கப்பட்ட எச்சரிக்கை நடவடிக்கை மூலம் 502 படகுகள் பாதுகாப்பாக கரைக்கு திரும்பி விட்டது. மேலும் 51 படகுகள் லட்சத்தீவு, கர்நாடகா, கோவா கடல் பகுதியில் இருப்பது கண்டுபிடிக்கப்பட்டுள்ளது. இதில் ஒவ்வொரு படகிலும் 10 முதல் 15 மீனவர்கள் இருப்பதாக கூறப்படுகிறது.  இந்த படகுகளில் உள்ள 500 முதல் 600 மீனவர்களை பாதுகாப்பாக கரைக்கு கொண்டு வர மீன்வளத்துறை சார்பில் அனைத்து நடவடிக்கைகளும் எடுக்கப்பட்டு வருகிறது. தேவைப்பட்டால் இந்திய விமானப்படை ஹெலிகாப்டர், மற்றும் விமானங்கள் இந்த பணியில் ஈடுபடுத்தப்படும்.அதேபோன்று தூத்துக்குடி மாவட்டத்தில் இருந்து 135 பெரிய படகுகளும், ராமநாதபுரத்தில் இருந்து 15 பெரிய படகுகளும் ஆழ்கடல் பகுதிக்கு மீன்பிடிக்க சென்றது. ஆனால் அவை அனைத்தும் பாதுகாப்பாக கரைக்கு திரும்பி விட்டன. முதல்வரும் இந்த பணியை தொடர்ந்து கண்காணித்து வருகிறார். இவ்வாறு கூறினார்.

2017 நவம்பர் 29ல் உருவான ஓகி புயல் தாக்கம் டிசம்பர் 6ல் வலுவிழந்தது. இலங்கை, தென் இந்தியா, மாலத்தீவு ஆகிய இடங்களை தாக்கியது. 245 பேர் பலியானார்கள். 665 பேர் மாயமானார்கள். அதிகபட்சமாக 185 கிமீ வேகத்தில் காற்று வீசியது.

தமிழ் மேட்ரிமோனி.காம் - தமிழர்களின் திருமண இணையத்தளம் - பதிவு இலவசம்!

மேலும் செய்திகள்

Like Us on Facebook Dinkaran Daily News
  • 23-06-2018

    23-06-2018 இன்றைய சிறப்பு படங்கள்

  • chennai_protest123

    நீட் தேர்வில் நிரந்தர விலக்கு கோரி தலைமைச் செயலகத்தை முற்றுகையிட முயற்சி: மாணவர்கள் கைது

  • cleanesttrainPurityIndia

    ரயில்வே பாதுகாப்பு படை சார்பில் தூய்மை ரயில் - தூய்மை இந்தியா

  • fifa_fans123

    உலகக் கோப்பை கால்பந்து போட்டி: முகத்தில் வர்ணம் பூசி உற்சாகமாக கண்டுகளிக்கும் ரசிகர்கள்!

  • whatsapp_police11

    வாட்ஸ் அப் வதந்திகளை நம்பாதீர் : தண்டோரா போட்டு பிரச்சாரம் செய்யும் பெண் ஐபிஎஸ் அதிகாரிக்கு சல்யூட்

படங்கள் வீடியோ கல்வி சினிமா ஜோ‌திட‌ம்