கொல்கத்தா: தமிழர் திருநாளான தை பொங்கல் பண்டிகை உலகம் முழுவதும் தமிழர்களால் சிறப்பாக கொண்டாடப்பட்டு வருகிறது. இயற்கை நன்றி செலுத்தும் உயர்வான விழாவான உழவர் திருநாள் தை முதல் நாளில் கொண்டாடுவது தமிழர்களின் மரபு ஆகும். அப்படிப்பட்ட பொங்கல் விழாவை முன்னிட்டு இன்று தரணி எங்கும் தமிழக மக்கள் பொங்கல் விழாவை கொண்டாடி வருகின்றனர். அதிகாலையிலேயே எழுந்து வீட்டின் முன் வண்ண கோலங்கள் தீட்டி புதுப்பானையில் புத்தரிசியிட்டு மஞ்சள், கரும்பு உள்ளிட்டவைகள் வைத்து பொங்கலோ பொங்கல் என உற்சாக குரல் எழுப்பி வழிபட்டனர். சென்னை, மதுரை, கோவை உட்பட தமிழகம் முழுவதும் மக்கள் அதிகாலையில் பொங்கல் வைத்து சூரியனை வழிபட்டனர்.

இதையொட்டி பல்வேறு மோடி உள்ளிட்ட அரசியல் தலைவர்களும் திரையுலக பிரபலங்களும் பொங்கல் வாழ்த்துக்களை தெரிவித்து வருகின்றனர். இந்நிலையில் மேற்குவங்க முதல்வர் மம்தா பானர்ஜி தமிழில்  பொங்கல் வாழ்த்துக்களை தெரிவித்துள்ளார். இதுகுறித்து அவர் டுவிட்டரில் தெரிவித்துள்ளதாவது: தமிழ்நாட்டு மக்களுக்கு என் இதயம் கனிந்த பொங்கல் நல்வாழ்த்துக்கள். இத்திருநாளில் எனது தமிழ் சகோதர, சகோதரிகளுக்கு ஆரோக்கியம், மகிழ்ச்சி, செழிப்பு கிடைக்க எனது வாழ்த்துக்கள். இவ்வ்வாறு அவர் தெரிவித்துள்ளார்.