திருவொற்றியூர்: அடிப்படை வசதிகளை செய்து தரக்கோரி, மணலி சிபிசிஎல் நிறுவனத்தில் ஒப்பந்த தொழிலாளர்கள் வேலை நிறுத்தப் போராட்டத்தில் ஈடுபட்டனர். சென்னை மணலியில் உள்ள சிபிசிஎல் என்ற மத்திய அரசு நிறுவனத்தில் 10 ஆயிரத்துக்கும் மேற்பட்ட ஒப்பந்த தொழிலாளர்கள் பணிபுரிந்து வருகின்றனர். இங்கு பராமரிப்பு, உற்பத்தி, விரிவாக்கம் மற்றும் அலுவலகப் பணிகளில் ஒப்பந்த தொழிலாளர்கள் பணிபுரிந்து வருகின்றனர். இவர்களுக்கு தேவையான குடிநீர், கழிப்பறை, உணவகம் உள்ளிட்ட எவ்வித அடிப்படை வசதிகளும் செய்து தரவில்லை என கூறப்படுகிறது.

பலமுறை கோரிக்கை விடுத்தும், தொழிற்சாலை நிர்வாகம் எவ்வித நடவடிக்கையும் எடுக்கவில்லை. கான்ட்ராக்ட் ஊழியர்களுக்கு மத்திய அரசு அறிவித்த ஊதிய உயர்வை கடந்த 6 மாதங்களாக சிபிசிஎல் நிர்வாகம் அமல்படுத்தாமல் கிடப்பில் வைத்திருப்பதாகவும் குற்றச்சாட்டு எழுந்துள்ளது இந்நிலையில், இந்த கோரிக்கைகளை வலியுறுத்தி நேற்று காலை சிபிசிஎல் நிறுவன வாசலில் ஒருநாள் அடையாள வேலை நிறுத்தப் போராட்டம் நடந்தது. அசோசியேஷன் தலைவர் பிராங்க்ளின் ஜெயக்குமார் தலைமை வகித்தார். கவுரவ தலைவர் கணேசன் முன்னிலை வகித்தார்.

இதில் ஏராளமான ஒப்பந்த தொழிலாளர்கள் கலந்து கொண்டு கோரிக்கையை நிறைவேற்றக் கோரி கண்டன கோஷமிட்டனர். பின்னர், ஒப்பந்த தொழிலாளர்கள் சிபிசிஎல் நிறுவனத்துக்குள் செல்லாமல் பணியை புறக்கணித்தனர். இப்போராட்டத்தின் காரணமாக தொழிற்சாலையில் உற்பத்தி மற்றும் பராமரிப்பு பணி முற்றிலும் பாதிக்கப்பட்டது.