சீனாவில் நடைபெறும் உலக கோப்பை வில்வித்தை போட்டியின் ஆண்கள் காம்பவுண்ட் பிரிவு பைனலில் விளையாட இந்திய அணி தகுதி பெற்றுள்ளது.

நியூசிலாந்து மகளிர் ஹாக்கி அணியுடன் நடந்த 4வது போட்டியில் இந்தியா 0-3 என்ற கோல் கணக்கில் தோற்றது. இந்த தொடரில் இந்திய அணி தொடர்ச்சியாக 4வது தோல்வியை பெற்றது ஹாக்கி ரசிகர்களை ஏமாற்றத்தில் ஆழ்த்தியது. இந்திய வீராங்கனை நவ்ஜோத் கவுர் தனது 100வது சர்வதேச போட்டியில் விளையாடி சாதனை மைல்கல்லை எட்டினார்.

ஊக்கமருந்து சர்ச்சையில் சிக்கியதால் ரஷ்யாவுக்கு விதிக்கப்பட்ட தடையை நீக்குவது குறித்து உலக ஊக்கமருந்து தடுப்புக் கழகம் ‘வாடா’ ஆலோசித்து வருவதாக அதன் தலைவர் கிரெய்க் ரீடி தெரிவித்துள்ளார். இந்த தடை காரணமாகரஷ்ய தடகள வீரர், வீராங்கனைகள் கடந்த 2 ஆண்டுகளாக சர்வதேச போட்டிகளில் பங்கேற்க முடியாதது குறிப்பிடத்தக்கது.

சாம்பியன்ஸ் டிராபி தொடருக்கான இந்திய அணியில் இடம் பெற்றிருந்த மணிஷ் பாண்டே காயம் அடைந்துள்ளதால், அவருக்கு பதிலாக தமிழக வீரர் தினேஷ் கார்த்திக் (விக்கெட் கீப்பர்/பேட்ஸ்மேன்) சேர்க்கப்பட்டுள்ளார். 71 ஒருநாள் போட்டிகளில் விளையாடி உள்ள கார்த்திக், 1313 ரன் எடுத்துள்ளார் (சராசரி 27.93). அவர் இந்திய அணிக்காக மொத்தம் 24 போட்டிகளில் விக்கெட் கீப்பராக செயல்பட்டுள்ளார்.

டி20 போட்டிகள் மழையால் பாதிக்கப்படும்போது புதிய இலக்கை நிர்ணயிக்க டக்வொர்த்/லூயிஸ் விதியை உபயோகிப்பதற்கு பல தரப்பிலும் எதிர்ப்பு எழுந்துள்ளது. ஐபிஎல் 10வது சீசன் எலிமினேட்டரில், இந்த விதி காரணமாக நடப்பு சாம்பியன் சன்ரைசர்ஸ் அணியின் வெற்றி வாய்ப்பு பறிபோனது குறிப்பிடத்தக்கது. புனே அணியின் பயிற்சியாளர் ஸ்டீபன் பிளெமிங் இது குறித்து கூறுகையில், ‘ஒருநாள் போட்டிகளுக்கான டி/எல் விதியை டி20 போட்டியில் அமல்படுத்துப்போது இலக்கை துரத்தும் அணிக்கு சாதகமாக அமைந்துவிடுகிறது. இதனால், ஓவர்களை குறைப்பதுடன் சேஸ் செய்யும் அணியின் விக்கெட் எண்ணிக்கையை குறைப்பது அவசியம்’ என்றார்.