சேலம் : 2வாரங்கள் மட்டுமே உயிர் வாழும் தன்மை கொண்ட அபூர்வமான அட்லஸ் அந்துப்பூச்சிகள் ஏற்காட்டில் இருப்பது தெரியவந்துள்ளது.  அந்துப்பூச்சிகள் என்பவை வண்ணத்துப்பூச்சி போன்ற தோற்றம் உடையவை. ஆனால் இரண்டிற்கும் இடையே நிறைய வேறுபாடுகள் உண்டு. அந்துப்பூச்சிகளை விட்டில் பூச்சி என்றும் பட்டாம் பூச்சி என்றும் அழைக்கின்றனர். இப்பூச்சி வகைகளில் உலகளவில் சுமார் 1,60,000 இனங்கள் உள்ளன. பெரும்பாலான அந்துப்பூச்சிகள் இரவில் மட்டுமே உலாவுகின்றன. இந்த நிலையில், அட்லஸ் அந்துபூச்சி என்ற  அபூர்வ வகை அந்துப்பூச்சிகள் சேலம் ஏற்காட்டில் இருப்பது அறிவியல் ஆர்வலர்கள் நடத்திய ஆய்வில் கண்டு அறியப்பட்டுள்ளது. இது குறித்து அறிவியல் ஆர்வலர் இளங்கோ கூறியது:

அந்துப்பூச்சிகளில் மிகப்பெரியது அட்லஸ் அந்துப்பூச்சி. இது இந்தியாவின் இமயமலைப்பகுதி, சீனா, மலாய், ஆஸ்திரேலியா ஆகிய இடங்களில் வசிக்கின்றன. இது சிறகை விரித்து நிற்கும்போது, அதை பார்ப்பதற்கு அட்லஸ் அதாவது உலக வரைபடம் போன்று இருக்கும் என்பதால்  அட்லஸ் மாத் எனப் பெயரிட்டுள்ளனர். சிறகின் நுனிப் பகுதியானது விஷப்பாம்பின் தலை போன்று உள்ளது. ஆகவே இதனை பாம்புத்தலை அந்துப்பூச்சி என சீன மக்கள் அழைக்கின்றனர். அட்லஸ் அந்துப்பூச்சியானது ஏற்காட்டில், கடந்த ஏப்ரல் மாதத்தில் நடந்த ஆய்வில் கண்டு பிடிக்கப்பட்டுள்ளது.