வானூர் : வானூர் அருகே நகை ஆசையால் மாணவி கிணற்றில் தள்ளி கொலை செய்யப்பட்டார். இது தொடர்பாக பத்தாம் வகுப்பு மாணவியை போலீசார் கைது செய்துள்ளனர். இச்சம்பவம் பெரும் பரபரப்பை ஏற்படுத்தி உள்ளது. விழுப்புரம் மாவட்டம் வானூர் தாலுகா கிளியனூர் காவல் சரகத்திற்கு உட்பட்ட மொளசூர் கிராமத்தை சேர்ந்த 14 வயது மாணவி சசிரேகா, ஓமந்தூர் அரசு மேல்நிலைப்பள்ளியில் 9ம் வகுப்பு படித்து வந்தார். இந்நிலையில், நேற்று முன்தினம் கோவடி கிராமத்தில் உள்ள விவசாய கிணற்றில் சசிரேகா சடலமாக மிதந்தார். கிளியனூர் போலீசார் சடலத்தை மீட்டு கனகசெட்டிக்குளத்தில் உள்ள பிம்ஸ் மருத்துவமனைக்கு பிரேத பரிசோதனைக்காக அனுப்பி வைத்தனர். சசிரேகா சாவில் சந்தேகம் இருப்பதாக கூறி பெற்றோர் மற்றும் உறவினர்கள் திண்டிவனம்-புதுச்சேரி சாலையில் மறியலில் ஈடுபட்டனர்.

இதுகுறித்து போலீசார் நடத்திய விசாரணையில் அதே பள்ளியில் 10 வகுப்பு படிக்கும் மாணவி ஒருவர், சசிரேகா அணிந்திருந்த கம்மலுக்கு ஆசைப்பட்டு  கிணற்றில் தள்ளி விட்டதாகவும்,  நீச்சல் தெரியாததால் கிணற்று நீரில் தத்தளித்து உயிருக்கு போராடிய சசிரேகா சத்தம் போட்டும், அதை காதில் வாங்காத அந்த மாணவி நகையுடன் தனது வீட்டுக்கு ஓடிவிட்டதும் தெரியவந்தது. அவரை போலீசார் கைது செய்தனர்.