தாம்பரம்: தாம்பரம் அடுத்த செம்பாக்கம், ராஜகீழ்ப்பாக்கத்தை சேர்ந்தவர் பானுமதி (61). இவர், நேற்று முன்தினம்  இரவு 8 மணியளவில் வீட்டின் அருகில் உள்ள கடைக்கு சென்றுவிட்டு, அங்கிருந்து வீட்டிற்கு நடந்து வந்து கொண்டிருந்தார். அப்போது, பின்தொடர்ந்து பைக்கில் வந்த மர்ம ஆசாமிகள் பானுமதி கழுத்தில் கிடந்த 5 பவுன் தங்க செயினை பறித்தனர். இதனால், அதிர்ச்சியடைந்த பானுமதி, திருடன்... திருடன்... என அலறி கூச்சலிட்டார். பொதுமக்கள் ஓடி வருவதற்குள் ஆசாமிகள் தப்பினர். இதுகுறித்து சேலையூர் போலீசில் பானுமதி புகார் செய்தார். போலீசார் வழக்கு பதிவு செய்து பைக்கில் வந்த ஆசாமிகளை தேடி வருகின்றனர்.