வியட்நாமில் தேசிய சபை தலைவர் நிகுயென் தி கிம் நிகானுடன் ஜனாதிபதி ராம்நாத் கோவிந்த் சந்திப்பு

ஹனோய் : ஆறு நாட்கள் வியட்நாம் மற்றும் ஆஸ்திரேலியா நாடுகளில் ஜனாதிபதி ராம்நாத் கோவிந்த் அரசுமுறை சுற்றுப்பயணம் மேற்கொண்டுளார். அவருடன் மத்திய அரசின் உயரதிகாரிகள் குழுவும் சென்றுள்ளது. வியட்நாம் நாட்டில் உள்ள கடலோர நகரமான டா நாங் நகரில் ஜனாதிபதி ராம்நாத் கோவிந்த்திற்கு சிவப்பு கம்பள வரவேற்பு அளிக்கப்பட்டது. இதனை தொடர்ந்து குவாங் நாம் நகருக்கு சென்ற ராம்நாத் கோவிந்த், கி.பி. நான்காம் நூற்றாண்டில் சம்பா வம்சத்தை சேர்ந்த மன்னர்களால் உருவாக்கப்பட்ட மை சன் கோவில்களையும், கோபுரங்களையும் பார்வையிட்டார். 3ம் நாளான இன்று தேசிய சபை தலைவர் நிகுயென் தி கிம் நிகானை சந்தித்து ஆலோசனை நடத்தினார். இதையடுத்து ஹனோயில் உள்ள போர் வீரர்கள் மற்றும் தியாகிகள் நினைவுச் சின்னத்தில் ராம்நாத் கோவிந்த் மலர் வளையம் வைத்து மரியாதை செலுத்தினார். நாளை வரை வியட்நாமில் தங்கும் ராம்நாத் கோவிந்த், அந்நாட்டின் ஜனாதிபதி, பிரதமர் மற்றும் பல்வேறு தலைவர்களை சந்தித்து இருநாடுகளுக்கிடையிலான நல்லுறவுகளை பலப்படுத்துவது தொடர்பாக ஆலோசனை நடத்துகிறார்.