சேலம்,ஜன.24: சேலத்தில் சிறுமியை பாலியல் பலாத்காரம் செய்த வாலிபருக்கு 10 ஆண்டு சிறை தண்டனையை நீதிமன்றம் விதித்தது.சேலம் அம்மாபேட்டையை சேர்ந்த 16 வயது சிறுமி, தனது பாட்டி வீட்டில் வசித்து வந்தார். கடந்த 2012ம் ஆண்டு, பக்கத்து வீட்டை சேர்ந்த சந்திரன் (35) என்பவர், அந்த சிறுமியை பாலியல் பலாத்காரம் செய்தார். பின்னர் சேலம் சைல்டுலைன் காப்பகத்தில் தங்க வைக்கப்பட்டபோது, தன்னை பாலியல் பலாத்காரம் செய்த சந்திரன் குறித்து சிறுமி தெரிவித்தார். இதுபற்றி அம்மாபேட்டை போலீசில் புகார் செய்யப்பட்டது. அப்போதைய இன்ஸ்பெக்டர் வெங்கடேசன் வழக்குப்பதிவு செய்து விசாரித்தார். சிறுமியை பாலியல் பலாத்காரம் செய்த சந்திரனை கைது செய்தனர். அப்போது விசாரணையில் அச்சிறுமியை அவரின் தந்தையின் நண்பரும் பாலியல் துன்புறுத்தலுக்கு உள்ளாக்கியது தெரியவந்தது. அவரையும் போலீசார் கைது செய்தனர். இந்த வழக்கு சேலம் மாவட்ட மகளிர் நீதிமன்றத்தில் நடந்து வந்தது. வழக்கை விசாரித்த நீதிபதி விஜயகுமாரி நேற்று தீர்ப்பளித்தார். அதில், சிறுமியை பாலியல் பலாத்காரம் செய்த சந்திரனுக்கு 10 ஆண்டு சிறை மற்றும் ₹35 ஆயிரம் அபராதம் விதித்து உத்தரவிட்டார். இதையடுத்து சந்திரனை போலீசார் சேலம் மத்திய சிறையில் அடைத்தனர்.