கோவை, டிச.4: கோவை தடாகம் பகுதியில் விவசாய நிலங்களுக்குள் புகுந்து யானைகள் வாழை உள்ளிட்ட பயிர்களை நாசம் செய்து வருகிறது. தொடர்ந்து அதே பகுதியில் அட்டகாசம் செய்து வரும் யானையை வனத்துறையினர் விரட்ட முடியாமல் திணறி வருகின்றனர். இந்த யானையை பிடித்து முதுமலைக்கு கொண்டு செல்ல வேண்டும் என ஒருதரப்பினரும், யானையை பிடிக்க கூடாது என சமூகஆர்வலர்களும் வலியுறுத்தி வருகின்றனர். இந்நிலையில், யானை விவகாரம் குறித்து முடிவெடுக்க ஒரு வாரம் அவகாசம் வேண்டும் என வனத்துறையினர் தரப்பில் தெரிவிக்கப்பட்டுள்ளது.

மேலும், முதுமலையில் இருந்து வசீம் என்ற கும்கி யானை அழைத்து வரப்பட உள்ளது. இதற்கிடையில், யானைகள் குறித்து பல்வேறு ஆராய்ச்சிகளில் ஈடுபட்டு வரும் யானைகள் நிபுணர் அஜய் தேசாய் நேற்று கோவை வந்தார். இவர், சர்ச்சைக்குரிய யானை நடமாட்டம் உள்ள தடாகம் பகுதிக்கு சென்று ஆய்வு நடத்தினார். அங்குள்ள மக்களிடம் பேசினார்.  யானை வழித்தடங்களை பார்வையிட்ட பின்னர், வனத்துறையினருடன் ஆலோசனை நடத்தினார். இதைத்தொடர்ந்து, காட்டு யானையை பற்றி ஆய்வு நடத்தி அவர் தனது முடிவை தெரிவிப்பார்.  இதையடுத்து யானையை பிடிப்பதா அல்லது அடர்ந்த வனப் பகுதிக்குள் விரட்டப்படுமா என்பது குறித்து தெரியவரும்.